Los sindicatos proponen tresllaos a Starglass pa salvar 17 puestos de trabayu de Rioglass Solar

L’ERE presentáu’l xueves por Rioglass Solar, aprovechando la llexislación llaboral nueva, afeuta a 200 trabayadores y dexa a 17 na cai. Los sindicatos proponen a la empresa tresllaos a Strarglass, del mesmu grupu, pa salvar los emplegos.
 
Les 17 persones que perderíen el so puestu tres l’Espediente de Regulación d’Emplegu (ERE) anunciáu pola empresa perteneceríen a les dos factoríes del Caudal: nueve na de Sovilla (Mieres) y ocho na de Viḷḷayana (Ḷḷena). Nun primer momentu, Rioglass Solar aceptó estudiar la propuesta de los sindicatos SOMA-FITAG-UXT y CC OO.
 
El secretariu d’aición sindical del SOMA-FITAG-UXT, José Antonio Menéndez Barriada, aseguró que la  opción "más viable" ye’l treslláu de los trabayadores y refugó "rotundamente" los despíos. Tamién treslladó a la patronal "la disconformidá" del so sindicatu respeuto a la presentación d’un documentu nuevu tres la reforma llaboral, anque aseguró que "nos mantendremos na negociación, pa ver a qué acuerdos podemos llegar enantes d’aniciar aiciones llegales". Nel marcu nuevu llegal, la empresa nun necesita que l’autoridá llaboral dea lluz verde al ERE nel casu de que nun esista alcuerdu coles centrales.
 
Los sindicatos SOMA-FITAG-UGT y CC OO convocaron un alcuentru nuevu cola patronal pal miércoles próximu nel qu’esperen algamar el compromisu de la empresa d’evitar los despíos pa continuar col restu de puntos de la negociación. Ente ellos alcuéntrase la propuesta de regular per trés meses de forma non rotatoria a los 200 trabayadores de les dos plantes del Caudal.
 
Otra manera, Barriada anunció que’l so sindicatu ta acabante de conseguir una sentencia favorable tres la so denuncia polos turnos "irregulares" que s’implantaren na planta de Starglass Asturias. Según Barriada, SOMA-FITAG-UGT ta a la espera de que la empresa "nos convoque pa aniciar otra vuelta la negociación".