Los sindicatos mayoritarios cifren nun 92 por cientu’l siguimientu de la fuelga xeneral n’Asturies

|

El siguimientu de la fuelga xeneral nel país foi del 92 por cientu, según les cifres apurríes por CC OO, UXT y USO, superando en 12 puntos la media estatal. La xornada, que finó con cinco detenciones, tuvo manifestaciones masives en Xixón y Uviéu.

Estos rexistros son mayores a los del paru del 29 de marzu, cuando l’apoyu a la convocatoria de fuelga xeneral rondó’l 90 por cientu. Sicasí, la patronal aseguró que la convocatoria foi inferior a les anteriores. Lo cierto ye que les dos manifestaciones celebraes en Xixón y Uviéu foron masives, con una participación mayor que hai ocho meses.

La primer d’elles tuvo llugar en Xixón, al meudía, convocada por CSI, CGT, CNT y SUATEA, que convivió con otra de CC OO, UXT y USO con mesmu percorríu y final, nesti casu, na Plaza Mayor. Los minoritarios cifraron la so participación en 20.000 persones, a los qu’hai que sumar los 5.000 qu’acompañaron la marcha de los mayoritarios, que diba 20 metros per detrás de la cola de la manifestación con posa n’El Náutico. Tres la llectura de dellos comunicaos nel llugar, una bona parte de los presentes marcharon hasta la Comisaría de Policía pa pidir la lliberación de les cuatro persones deteníes alredor de les 10 de la mañana na cai Llangréu y en L’Acerona poles fuercies del orde, que llueu trataron d’asaltar la Casa Sindical, ensin ésitu. Estes aiciones finaron con 16 feríos, de los que siete yeren axentes. Les persones presentes nel llugar criticaron l’aición de los policíes, ente los qu’había efeutivos de la Llocal, lo que va llevar a Jorge Espina, voceru d’Izquierda Xunida-Los Verdes d’Asturies nel Conceyu de Xixón, a pidir explicaciones al gobiernu municipal.

Centenares de manifestantes permanecieron nel llugar per delles hores hasta que los piquetes foron lliberaos a les 16.15 hores baxo cargos de daños y atentáu a l’autoridá. Hai que destacar qu’ésta nun foi la detención única del día nel país, yá que la Guardia Civil arrestó a una persona n’Uxo acusáu de firir a dos axentes mientres un corte de carretera.

La marcha más numberosa, la d’Uviéu

La manifestación convocada a les 18 hores na uviedina plaza d’América tuvo un siguimientu espectacular, siendo una de les mayores del Estáu. Pese a que los sindicatos convocantes, CC OO, UXT y USO prefirieron nun dar cifres, éstos estimaben alredor de 100.000 participantes, cantidá menguada pola Policía Llocal d’Uviéu hasta los 35.000.

Na semeya, protesta frente a la Comisaría de Policía de Xixón pa pidir la lliberación de los cuatro deteníos tres la carga policial de la cai Llangréu. Imaxe perteneciente a la Corriente Sindical d'Izquierda (CSI).

 

Contador Estadistiques