Los sindicatos denuncien les males condiciones d’enseñu del asturianu nel entamu de cursu

Con motivu del entamu del cursu escolar, los trés sindicatos mayoritarios na enseñanza asturiana, SUATEA, CCOO Y FETE-UXT emitieron un comunicáu conxuntu en que denuncien que la situación de l'asignatura de llingua asturiana alcuentra "les mesmes precariedaes" que n'otros años y que nun hai novedaes al respective.

La situación llaboral de los mayestros d'asturianu ye ún de los puntos que denuncien les organizaciones sindicales, que llamenten que en Primaria "el 50% de places alxudicaes fasta la fecha a interinos son itinerantes, mientres qu'un 33% son medies xornaes", dándose tamién nsti casu un tantu por cientu altu d'itinerancia, ello ye, qu'un mesmu docente tien de poner clase en centros distintos. El porcentaxe de medies xornaes en secundaria ye del 58%, dándose'l casu de que delles son compartíes con otra materia que tien d'impartir la mesma persona. Llamentable ye la situación na que s'atopa la llista de gallego-asturiano, na que ya nun queden mayestros y entovía nun s'abrió.

El nuevu curriculum d'asturianu, documentu que los sindicatos pidieron negociar con Educación ensin consiguilo, ye otru de los puntos sobre los que se tien la denuncia sindical, que recuerda como se caltién "el ratio de númberu mínimu d'alumnos pa que se dea l'asigntaura" y que ye de 10 en primaria y 8 na ESO, ello mientres "la obligatoriedá de la ufierta de llingua asturiana, y l'ausencia de conteníos curriculares de la so alternativa, nun se cumple nos centros concertaos".

Les trés organizaciones sindicales firmantes del comunicáu reconocen nun saber d'inspectores dedicaos a esti siguimientu, pero alvierten que "les cifres canten" y asina "mientres l'añu pasáu había trés profesores d'asturianu en trés centros que lo ufiertaben, esti añu la cantidá ye la mesma" asegurando tener "conocimientu de centros que faen refuerzos de llingua española nel horariu d'alternativa a llingua asturiana".

SUATEA, CCOO y FETE - UXT saquen en conclusión de too ello que "l'asturianu nun figura como una prioridá pal gobiernu nel nuesu sistema educativu, ye una materia de segundu orden nel actual ordenamientu educativu" pidiendo la eliminación de les ratios mínimes pa la constitución de grupu, la incorporación de la enseñanza de la Llingua Asturiana nel Currículu d'Infantil, midíes de estabilización en plantilla de los docentes de llingua y la negociación en Mesa Sectorial de Llingua Asturiana.