Los sindicatos d’enseñanza recurren contra la carrera docente

Los sindicatos d'enseñanza SUATEA, CCOO y CSI-CSIF presentaron ayeri énte'l Tribunal Superior de Xusticia d'Asturies (TSXA) un recursu contenciosu-alministrativu contra la Resolución de la Conseyería d'Alministración Pública "pola que se-yos impón a los profesores obligación de firmar un documentu en blanco pol que se comprometen a aceptar una carrera profesional de la que nun se conocen los conteníos" en palabres de les organizaciones sindicales.



L'ausencia de base xurídica pal desarrollu de la carrera docente, en cuantes que la Llei de Función Pública Asturiana y l'Estatutu Docente nun existen entovía, el que namás se dean dos meses pa firmar y la "illegalidá" de la firma en blanco son los trés argumentos de más pesu nel escritu presentáu polos sindicatos, que sumen ente ellos la mayoría absoluta de la representación de la enseñanza non universitaria n'Asturies.

Ello ye que'l cuartu de los sindicatos mayoritarios na enseñanza asturiana, FETE UXT ta al favor de la carrera docente y nun comparte'l puntu de vista de los otros trés, que lu acusaron d'apertar sobre l'alministración pa que desconvocare una reunión prevista coles organizaciones contraries a la carrera docente, una midida al traviés de la que'l Gobiernu asturianu quier que se canalicen los complementos salariales a los maestros, que tendríen de pasar una evaluación pa recibir los pagos.

Los sindicatos faen un llamáu a que la situación s'arregle al traviés de la negociación y alvierten que, de nun facese asina, ello supondría un entamu de cursu a la vuelta de vacaiones tremáu de movilizaciones.