Los sindicatos d’enseñanza CCOO, SUATEA y FETE-UXT sofiten la manifestación del sábadu

Con motivu de la convocatoria pal próximu sábadu 24 de payares de la manifestación na que la plataforma Conceyu Abiertu pola Oficialidá va pidir la oficialidá del asturianu na reforma del estatutu l'asturianu, los sindicatos de docentes SUATEA, FETE-UXT y Federación d'Enseñanza de CCOO ficieron públicu un comunicáu en que declaren el so sofitu a la marcha cívica, llamando a la participación nella.



Los sindicatos denuncien al mesmu tiempu les carencies na escolarización de la llingua asturiana y aseguren que la demanda d'escolarización en llingua asturiana volvió a medrar, con un númberu de vacantes de docentes en Llingua asturiana que medró alredor del 5% y que por primer vegada superen les 200. La situación del colectivu interín, nel que namás un 30 % de los docentes trabayen a tiempu completu en Llingua Asturiana y nun únicu centru ye otru de los motivos que lleven a los sindicatos a secundar la movilización del sábadu. Los sindicatos recuerden que nel "Plan de normalización social del asturianu 2005 - 2007" el gobiernu asturianu comprometióse na so Acción 34 a "Realizar un estudiu xurídicu sobre la posible especialidá del profesoráu de llingua asturiana" enantes que terminara l'añu 2006 y llamemten que "termina'l 2007 y ya se pue ver que l'incumplimientu ye una mena intencionada d'aparcar la cuestión".
En cuantes a les condiciones en que se desarrolla la escolarización, los trés sindicatos denuncien que'l derechu al estudiu de la llingua asturiana nun ta garantizáu nel sistema educativu asturianu, al nun respetase la Llei d'Usu. "Pa entamar" denuncien SUATEA, CCOO y FETE, "na etapa d'Infantil la Conseyería d'Educación nun tien voluntá d'incorporar la enseñanza d'asturianu creando en munchos neños y neñes un conflictu ente lo que sienten nel so entornu y lo que-yos deprenden na escuela. En Primaria la situación ye más favorable dada la so presencia nel currículu", pero, sicasí, los sindicatos llamenten "la esistencia de ratios mínimes de 10 alumnos en primaria y la competencia con otres materies en secundaria".


Nesta viéspora de manifestación, los sindicatos faen rescamplar la situación nos centros concertaos, onde recuerden que "nun existía obligación d'ufiertar llingua asturiana en primaria hasta la publicación del Currículu de Primaria" y onde "namái 3 centros concertaos teníen constituyíos grupos d'asturianu lo que representaba un 1% de los alumnos y alumnes d'esti tipu de centros". Ello ye que "Nesti cursu'l númberu de centros que lu ufierten ye'l mesmu, y el númberu de profesores d'asturianu contrataos ye'l mesmu" dalgo que-yos abulta "difícil d'entender, dada la obligatoriedá de la so ufierta y la imposibilidá de da-y un conteníu curricular a la so optativa" y qu'espliquen por "'incumplimientos por diferentes víes". Los sindicatos dicen saber de "neños y neñes qu'acuden a refuerzos de llingua castellana, taller de nueves tecnoloxíes y otros tipos d'actividaes que refuercen el currículu d'otres árees".


Los sindicatos SUATEA, FETE-UXT y Federación de Enseñanza de CCOO conclúin defendiendo la oficialidá de la llingua asturiana y por ello anuncien que van participar na movilización del próximu Sábadu, y piden al empar la incorporación de la Llingua y la Cultura Asturianes nel currículu d'Infantil, la eliminación de les ratios mínimes en tolos niveles pa la constitución de grupos de llingua asturiana y gallego asturianu, xunto col siguimientu efectivu del cumplimientu de la normativa por parte de tolos centros educativos.