Los sindicatos d’enseñanza aconceyaron con Riopedre pol currículum d’asturianu

Los sindicatos d'enseñanza asturianos tuvieron ayeri una reunión d'urxencia col conseyeru d'educación José Luis Iglesias Riopedre pa tratar sobre'l polémicu proyectu de currículum de primaria que presentó'l pasáu llunes la Conseyería d'Educación. El tratamientu curricular de l'asignatura d'asturianu centró la xunta ente conseyeru y sindicatos, comprometiéndose verbalmente Iglesias Riopedre a rectificar la redacción actual del documentu, que pon l'asignatura d'asturianu a competir con otres materies curriculares.

La importancia del tema fexo qu'a la reunión con Riopedre acudieren miembros de tolos sindicatos d'enseñanza representaos na Xunta de Personal Docente sacantes CSIF, que, anque quixo tar presente, nun pudo unviar representante por coincidir con un congresu de la organización. Énte los representantes de SUATEA, CC.OO, UXT y ANPE, Riopedre esplicó que na ellaboración del curriculum l'asignatura de "cultura asturiana" tradicional alternativa a l'asignatura de llingua, desapaeció al integrase dientro de los conteníos de la estaya de conocimientu del mediu, lo que dio llugar a l'actual redacción del curriculum, que calificó de "error" y que se comprometió personalmente a modificar pa que les alternatives a l'asignatura d'asturianu nun supongan competencia curricular.

Riopedre ofreció como posibilidá pa influyir na redacción del testu'l calce de suxerencies abiertu pola mesma conseyería y que ta abiertu, hasta'l próximu día 23, a la participación de la comunidá educativa, pero esta rempuesta nun dexo contentos a tolos representantes sindicales, que van volver a reunise pa tratar l'asuntu y que van tener güei un conceyu cola Xunta Pola Defensa de la Llingua Asturiana pa esponé-y el casu. Según pudo saber Asturies.com, dempués de la reunión d'ayeri, dende'l sindicatu SUATEA trabáyase na ellaboración d'un modelu conxuntu de suxerencia sobre la cuestión de l'asignatura d'asturianu que se consensuaría ente los sindicatos y que presentaría a tolos claustros de los más de 250 centros de primaria qu'hai n'Asturies pa que lu firmaren, ello col envís de facer llegar a la Conseyería una rempuesta unánime de tola comunidá educativa sobre la cuestión. Nesta propuesta de suxerencia conxunta recoyeríase la esixencia de retirada del testu actual y tamién la d'apertura de negociaciones colos sindicatos sobre'l futuru de l'asignatura.

L'afitamientu nel sistema educativu de l'asignatura d'asturianu esmolez muncho a los sindicatos de la educación n'Asturies, y ello ye que, nel planu puramente llaboral, del enseñu de la llingua del país depende'l futuru d'una masa importante de docentes. Según fontes consultaes por esti mediu, aproximadamente'l 20% de los interinos de primaria qu'hai n'Asturies ponen clas d'asturianu.