Los sindicatos caltienen la fuelga indefinía nel tresporte per carretera

Nun hubo alcuerdu nel Serviciu de Solución Estraxudicial de Conflictos y los sindicatos caltienen la fuelga indefenía nel tresporte per carretera. La patronal Asetra llegó a llevantase de la mesa de negociación a la media hora.
 
La separación de negociación y convenios de tresporte y mercancíes son el principal motivu de fisura. "Nun vimos nengún elementu d'averamientu; nun alcontramos nenguna novedá y a la media hora llevantámonos", afirmó un representante de l’Asociación de Empresarios del Transporte y Aparcamiento de Asturias (Asetra). Pela so parte, Manolo García, responsable de la estaya de tresporte de Comisiones Obreres (CC OO) consideró la postura de la patronal "una tomadura de pelo más". "Llegaron, propunxéronmos cuatro barbaridaes y volviéronse a llevantar", afirma en referencia a Asetra. Según el líder sindical, les centrales dexaron nidio que "nun tán pol llabor de negociar nada d'esto".
 
Ente los señalaos aspeutos polémicos ta la separación del conveniu de viaxeros y tresportes, dalgo que nun acepten los sindicato pero nel que'l presidente d'Asetra, Ovidio de La Roza, calcó esta mañana en rueda prensa: "Les condiciones ente emplegaos de mercancíes y de pasaxeros son distintes, siendo estes últimes, xunto coles propuestes formulaes poles patronales de viaxeros dientro de la plataforma común de negociación, les que provocaron el refugu sindical que llevó a la fuelga".