Los Sidros y La Comedia, y los Mazcaritos d’Uviéu representen al país nel FIMI de Lisboa

|
Los Sidros nel XIII Festival Internacional da Máscara Ibérica (FIMI)

El barriu lisboeta de Belém ta chiscáu de color dende’l xueves. Ye’l que dan les mazcaraes presentes nel XIII Festival Internacional da Máscara Ibérica (FIMI), con especial protagonismu de Los Sidros y La Comedia, que representen al país xunto colos Mazcaritos d’Uvieú.

Ésti ye’l decimu añu siguíu nel que la mazcarada de Valdesoto acude al mayor certame que se celebra nel mundu al rodiu d’esta tradición con un raigón especial na Península Ibérica. Los Sidros yá son bien conocíos en Lisboa, siendo protagonista de miles de semeyes de lisboetes y visitantes pa los que nun pasen desapercibíos los sos blincos y travesures.

Nesta edición del FIMI, que comenzó ayeri y va allargase hasta’l domingu, la delegación asturiana va completase colos Mazcaritos d’Uviéu, tradición recuperada l’añu pasáu. Los uvieínos y Los Sidros y La Comedia van participar nel Grande Desfile da Máscara Ibérica de mañana, con salida a les 16.30 hores, 25 mazcaraes de tola Península y dos de fuera, los irlandeses The Mummers y los brasileños Boi Tinga, conformando un total de más de mediu centenar de persones amazcaritaes.

Esti pasucais ye l’eventu central del certame y axunta a miles de persones atrayíes pola música y el coloríu de les diferentes mazcaraes. Otros iniciatives con munchu ésitu ye’l Palco Ibérico, qu’ufre conciertos nocherniegos, y la Mostra das Regiões, con actuaciones, danza y, sobre manera, gastronomía de los países y rexones participantes.

Nesti espaciu Asturies y los productos asturianos va tener un protagonismu especial, cola presencia de los conceyos de Siero y Tinéu. Amás, les indicaciones xeográfiques protexíes ‘Ternera Asturiana’ y ‘Chosco de Tineo’ van ser oxetu de delles amueses de cocina.

Na imaxe, un sidru mientres la inauguración del FIMI celebrada ayeri. Semeya obra de Mercedes Menéndez.

Contador Estadistiques