Los Sidros y La Comedia y el corri-corri yá son Bien d’Interés Cultural (BIC)

El Conseyu de Gobiernu ta acabante de declarar Bien d’Interés Cultural (BIC) a Los Sidros y La Comedia y al baille cabraliegu corri-corri. D’esta forma, dambes manifestaciones culturales pasen a tener el mayor nivel de proteición patrimonial nel país.

Los BIC son los “bienes más relevantes del patrimoniu cultural d’Asturies”, espresen dende’l Gobiernu, y pa ello han de ser declaraos como tales al traviés d’un decretu del Conseyu de Gobiernu. Éstos pueden ser materiales o inmateriales, como ye’l casu de la mazcarada de Valdesoto y del baille cabraliegu, y supón pa ellos una proteición grande de la tradición como amuesa’l fechu de que pa cualquier actuación o modificación de la mesma la Direición Xeneral de Patrimoniu Cultural ha de ser previamente informada.

Los Sidros y La Comedia, según apunten dende’l Gobiernu, qu’empodera’l trabayu de revitalización fechu pola Asociación pa la Recuperación de Los Sidros y Les Comedies ‘El Cencerru’ dende’l 2004, “son una amuesa del llargo ciclu del carnaval, una mazcarada d’iviernu que consiste na marcha de los sidros peles cais de la parroquia, vistíos con pantalones y camisa blancos, con una faxa collorada de la que cuelguen cuatro cencerros y coles melenes na cabeza –un cucuruchu de piel d’oveya rematáu por un rabo de raposu–. Asina vistíos, estos personaxes piden l’aguilandu a la cabeza d’un cortexu que representa les comedies, escenas costumistes con referencias a l’actualidá, nes que participen, amás de los sidros, representaciones del vieyu y la vieya, les dames, los comerciantes, policíes y un ciegu o un diañu”.

Tres años de trabayu, esta mazcarada vive un momentu de gran vitalidá, potenciando la so celebración de Valdesoto y convirtiéndose n’embaxadores d’Asturies n’otros llugares. Ye enforma especial el so venceyu col Festival Internacion Máscara Ibérica (FIMI) que se celebra tolos meses de mayu en Lisboa y nel que son una agrupación fixa tolos años pola so simpatía y orixinalidá.

Una baille “distintu”

Sobre’l corri-corri, l’Executivu destaca que “ye un baille de belleza singular, distintu a cualquier otru asturianu o español, que foi escoyíu en numberoses ocasiones pa representar el conxuntu de dances rexonales. Dende’l puntu de vista etnolóxicu, ye una espresión relevante de la cultura popular venceyada a un mou de vida. Asina, el baille pasó por delles coxuntures sociales y polítiques, siempre con gran apoyu social”.

D’igual forma apunta qu’esta danza, “como manifestación cultural, precisa d’elementos materiales dotaos de valor propiu, como los traxes d’aldeana cabraliega y de cabraliegu o bailín; la música y cantu o los instrumentos (tambor y pandorios). Too esi conxuntu permite apreciar el caráuter singular d’esti bien patrimonial”.