Los resultaos preliminares apunten a muerte por disparu nel osu atopáu en Mual
|
10 Setiembre, 2016 por Redacción
La investigación de los posibles delitos alcuéntrase nes manes del SEPRONA de la Guardia Civil y tamién va treslladase a la Fiscalía de Mediu Ambiente del Principáu d’Asturies.
El sábadu realizóse na facultá de Veterinaria de la Universidá de Llión la necropsia al osu pardu cantábricu, un machu adultu de 105 kg, atopáu muertu ayeri en Mual (Cangas). Los resultaos preliminares apunten a muerte por disparu con furacu d’entrada en llateral esquierdu al altor de la costiella flotante 12. Tamién se tomaron muestres de texíos y fluyíos corporales pa estudios tosicolóxicos y histopatolóxicos pertinentes.
La necropsia dirixóla’l catedráticu d’anatomía patolóxica Juan Francisco García Marín, y veterinarios de la Dirección Xeneral de Recursos Naturales y del Serida del Principáu d’Asturies.
Nestos momentos la investigación de los posibles delitos atópase nes manes del SEPRONA de la Guardia Civil, y tamién se va treslladar a la Fiscalía de Mediu Ambiente del Principáu d’Asturies.
Efrén d'Andrés
