"Los resultaos faen ralentizar el cambiu, que ye cuestión de tiempu", afirma Rodríguez Morón

El secretariu d'Organización de Podemos Asturies, Xuacu Rodríguez Morón, califica los resultaos algamaos por Xuníos Podemos nes eleiciones estatales del domingu como "insuficientes". "Ralenticen el cambiu, que ye cuestión de tiempu", añade.

Tres apuntar que "nun los esperábemos", Rodríguez Morón quixo quedase colos datos positivos. "N'Asturies afianzámonos nos sitios nos que fuimos primer fuercia, como en Mieres, y consiguimos ser primera tamién en Llangréu. Amás, somos segunda fuercia nos conceyos más poblaos, perriba del PSOE, como Xixón, Uviéu, Avilés, Castrillón...", esplica.

"Los resultaos faen ralentizar el cambiu, que ye cuestión de tiempu", afirma, pa depués destacar que la intención de Xuníos Podemos agora ye la "de tratar d'evitar un Gobiernu del PP". "La población taba cansada d'eleiciones, nun quería repetición eleutoral, por eso votó menos xente nesta ocasión. Pedro Sánchez, al nun querer llegar a nengún tipu d'alcuerdu con nosotros, forció esta situación que desmotivó a la ciudadanía y que dexa el Gobiernu más cerca del PP", apunta Rodríguez Morón.

"Susana Díaz afirmó güei que'l PSOE debería favorecer un Gobiernu de Rajoy pa reconstruyir el partíu dende la oposición. L'Estáu nun necesita un Gobiernu del PP de recortes", añade'l responsable d'Organización.

Acercamientu a IX

Sobre los resultaos a nivel estatal, apunta que "les confluencies foron mui positives naquellos sitios onde se lleven tiempu trabayando, como Euskadi o Catalunya" y señala que en dalgunos casos "igual corrimos muncho", pa lo qu'indica ye necesario "trabayar dende la base". "En Mieres o Avilés, onde hai munchu trabayu detrás, los resultaos llegaron", asegura.

D'igual, forma destaca que la coalición Xuníos Podemos permitió un "acercamientu a IX n'Asturies", rellación qu'espera pueda ampliase a les instituciones, sobre manera, nel Parllamentu asturianu. "Prestaríanos llegar a un tipu d'alcuerdu con IX na Xunta Xeneral y valtar les polítiques del PSOE", afirma.