Los reis d'España finen la so xira n'Asturies

Dellos coleutivos van protestar en Xixón baxo'l lema 'Asturies nun tien rei', ente ellos Andecha Astur, que'l llunes yá entamó una aición na ponte de Cangues d'Onís.

Los reis d'España van tar n'Asturies mañana dientro de la xira entamada pola Casa Real "pa reconocer l'esfuerciu del conxuntu de la sociedá española frente a la pandemia del COVID-19 y sofitar a distintos sectores sociales na recuperación de l'actividá". Tres pasar per toles autonomíes, la última Cantabria, con parada en Torrelavega y Santoña, Felipe VI y Letizia van finar el so viaxe nel país.

L'axenda de los monarques españoles inclúi una visita a Coxersa, al Muséu de Fernando Alonso y al monumentu xixonés 'Elogio del Horizonte'. Nesta ciudá ta convocada una concentración de protesta baxo'l lema 'Asturies nun tien rei' col sofitu de dellos coleutivos, como Andecha Astur, Anticapitalistes Asturies, Federación Asturiana Memoria y República (FAMYR), Comité d'Asturies pola Amnistía o Bloque Críticu Asturies, ente otros, a les 13 hores n'El Náutico, pa la que se pide que se lleven semeyes de los reis d'España.

Aición en Cangues

Andecha Astur ye una de les organización que más se ta movilizando contra la visita de Felipe VI y Letizia al país. Asina, el llunes entamó una aición na ponte de Cangues d'Onís, ún de los llugares más visitaos nestes feches, na que militantes fixeron un mosaicu con lletres nes que se pudo lleer 'República Asturiana'.