Los Pueblos Deciden, nome de la coalición na que va participar Andecha Astur nes Europees

Esti sábadu diose a conocer la coalición na que va participar Andecha Astur nes eleiciones Europees, de la que nun va formar parte Conceyu Abiertu. Lleva’l nome de Los Pueblos Deciden y ta liderada por EH Bildu y el BNG.

Xunto a les formaciones nacionalistes asturiana, vasca y gallega, tamién se sumen a esta candidatura pa les eleiciones al Parllamentu Européu del 25 de mayu Puyalón de Cuchas (Aragón) y Unidad del Pueblo y Alternativa Nacionalista Canaria (Canarias). Les seis organizaciones roblen un manifiestu nel qu’analicen el contestu actual de “crisis del sistema económicu capitalista” que sirve “d’escusa pa vaciar, ainda más, de llexitimidá democrático a la Xunión Europea”. Asina, al “poder abusivu qu’exercieron tradicionalmente’l Conseyu y la Comisión Europea ha d’amestase güei el control por parte de la Troika de los principales programes públicos”, apunten.

“Les formaciones que participamos de la candidatura ‘Los Pueblos Deciden’  atalantamos qu’eses elleiciones son un escenariu más de llucha pa combatir los planes de la Troika y en xeneral la deriva d’una XE que se pliega a los intereses de les corporaciones capitalistes mentes desfái de derechos a la clase trabayadora”, entendiendo que “l’impulsu decidíu a la soberanía de los nuesos pueblos ye la única manera p’avanzar escontra un modelu de sociedá xustu ya igualitariu”. Por ello, presenten “un programa de midíes que,  no inmediato, amenorguen los efeutos devastadores de les polítiques d’austeridá y que dea salida a la urxente situación d’emerxencia social”.

Ente los compromisos qu’anuncia la coalición ente l’eleutoráu destaca la defensa de la xusticia social, l’apoyu a los procesos independentistes como’l catalán o l'escocés, a les llibertaes democrátiques plenes y a la igualdá, mentes que refuga “la Europa del capital”, la uniformación cultural y llingüística, la discriminación de xéneru, el racismu y la xenofobia.

Conceyu Abiertu nun se presenta

Pese a que la intención d’Andecha Astur yera la de participar en Los Pueblos Deciden con una candidatura xunitaria asturiana, ésta al final nun se dio, situación que motivó la decisión del Conceyu Nacional de Conceyu Abiertu –celebráu’l sábadu nel Espaciu La Llegra (CSOA La Madreña) – de nun acudir a estes eleiciones. “Coincidióse en que la participación activa –eleutoral o non– del movimientu conceyil nesta cita namái tendría sentíu de facese dende una iniciativa soberanista xunitaria, qu’axuntara a tolos actores que formen parte d’esi espaciu políticu asturianu. Dao qu’esi escenariu yá nun ye posible pa estes eleiciones, Conceyu Abiertu decidió nun participar nes mesmes, dando prioridá a afitar el trabayu dende la base nos conceyos asturianos. De la mesma mena, Conceyu Abiertu reafirma’l so enfotu de siguir avanzando nel procesu de xunidá del soberanismu asturianu, nel que se vien trabayando dende tiempu atrás”, anunció la plataforma d’eleutores nun comunicáu.