Los Pueblos Deciden entrugó a Arias Cañete pol usu de cianuru en teunoloxíes mineres

Josu Juaristi, eurodiputáu de Los Pueblos Deciden, entrugó a Miguel Arias Cañete en nome d'Andecha Astur y el BNG pol usu de cianuru en teunoloxíes mineres. El popular será comisariu.

La cuestión tuvo llugar el pasáu día 1 nel esame del Europarllamentu a Arias Cañete con motivu de la so candidatura a comisariu d'Aición Climática y Enerxía. El vascu tresmitió-y la entruga "¿va obligar a estaos miembros, como l'español, a que cumpla la prohibición del usu de cianuru nes teunoloxíes mineres, tal como aprobó esta cámara nel 2010?", a lo que  l'ex ministru d'Agricultura, Alimentación y Mediu Ambiente respondió que "obligaré al Estáu español a que cumpla tola normativa comunitaria en materia de les mios responsabilidaes como a tol restu de los estaos de la Xunión Europea, porque la mio obligación como comisariu ye facer cumplir la normativa europea".

La pregunta d'Andecha Astur, formación integrada en Los Pueblos Deciden, vien en rellación al proyeutu mineru que quier desendolcar en Tapia la empresa de capital canadiense Astur Gold. Los nacionalistes, contrarios a esta mina d'oru, afirmen que "vamos siguir col tema nel Parllamentu européu al traviés del nuesu eurodiputáu".