Los profesores d’asturianu entreguen al Gobiernu más de 2.000 razones pa caltener y impulsar la materia

La maestros d’asturianu presentaron nel Rexistru un escritu pa la conseyera nel que se demanda una solución pa la materia énte la LOMCE. Acompañóse de 2.100 cartes d’escolinos nes qu’éstos amosaben el so ciñu hacia la llingua asturiana.

Tres l’asamblea celebrada’l 15 de xineru, los profesores de Llingua Asturiana y Gallego-asturiano decidieron, ente otres munches aiciones, trabayar colos alumnos pa que, en clase, redautaren cartes nes qu’espresaren el so sentir hacia la llingua. Asina, axuntáronse alredor de 2.100 redaiciones de neños y neñes de 44 centros escolares, qu’ayeri s’entregáron nel Rexistru Xeneral del Gobiernu xunto con diez resoluciones de claustros favoratibles a les demandes de los maestros, una cantidá que va aumentar nes selmanes próximes cuando más escueles celebren aconceyamientos. La convocatoria anuncióse a les 17.30 hores, pero foi a les 18 hores cuando, ún por ún, tolos docentes entregaron les cartes y una copia del escritu nel mostrador. Xunto a los maestros tamién acudieron militantes de Xunta Moza y de la Xunta pola Defensa de la Llingua Asturiana p’amosar el so sofitu.

Estes cartes queden agora a disposición del Executivu, que va poder comprobar el ciñu que tienen los escolinos y escolines hacia l’idioma. Dalgún profesor de Primaria inclusive destacaba la so sorpresa tres lleer los testos de los sos alumnos, sobre manera los más mayores, pola estima qu’amosaben hacia la llingua. Como nota negativa, dalgunos centros impidieron que s’entregaran les cartes alegando la privacidá nos datos de los alumnos.

L’escritu qu’acompañaba los testos fechos polos escolinos y escolines demanda a la conseyera d’Educación, Cultura y Deporte, Ana González, y al Gobiernu que “utilicen tolos medios necesarios pa camudar l’actual situación”, en referencia al llugar nel que queda la llingua asturiana cola entrada de la Llei Orgánica pa la Meyora de la Calidá Educativa (LOMCE), col oxetivu d’acabar “cuanto primero col status de segundu orde de la Llingua Asturiana, criando la especialidá nel Sistema Educativa y declarando la oficialidá”. Amás, el testu recuerda los 230 puestos de trabayu que peligren cola desapaición de la materia cola entrada de la Llei Wert tal como ta redautada anguaño, y critica la incertidume que provoca la conseyera col so silenciu sobre esti asuntu. Hai que destacar que González tampoco nun respondió’l pidimientu de los maestros de celebrar una reunión pa tratar la situación.

2.500 firmes en change.org y movilizaciones nueves

Depués de la entrega del escritu y les cartes, los maestros aconceyaron nel IES Aramo pa concretar les aiciones próximes. L’asamblea valoró de manera positiva la respuesta del profesoráu y trató dellos asuntos, como’l tema de les mociones treslladaes a los claustros o la enmienda presentada nel Conseyu Escolar del Estáu dende la conseyería asturiana. Los profesores consideraron ésta última como “una auténtica chapuza, tanto na forma como nel conteníu, yá que nun garantiza pa nada la continuidá de l’asignatura”.

Les decisiones tomaes nel conceyu d’ayeri foron participar en toles movilizaciones sociales que se presenten en feches próximes sobre los recortes y la política d’austeridá de les alministraciones con un cortexu propiu pa dar visibilidá a la problemática, asina como na manifestación contra la LOMCE del xueves (Uviéu, 18 hores) y la de tolos sectores en llucha del día 23 cola pancarta ‘Llingua nes escueles, como les demás’. Tamién ta prevista una concentración la tarde del 21 de febrero na plaza Escandalera d’Uviéu coincidiendo col Día Internacional de la Llingua Materna. Por último, l’asamblea afondó na necesidá d’implicar tamién a los padres, estudiantes y al conxuntu del profesoráu, y apautó demandar tamién la presencia del asturianu n’Infantil y la so incoporación como materia d’esame na PAU.

Otra manera, la campaña ‘Nun permitas que l'asturianu desapaeza del sistema educativu’, entamada al traviés de les redes sociales, en change.org, páxina  d’orixe estuaxunidense que recueye pidimientos d’usuarios pa denunciar y tratar de camudar asuntos concretos, yá tien recoyíes más de 2.500 firmes. Por caúna d’elles, la Conseyería d’Educación, Cultura y Deporte recibió un corréu electrónicu coles demandes de los profesores de Llingua Asturiana y Gallego-asturiano.

Profesores y militantes de Xunta Moza aconceyen frente al Rexistru minutos enantes d’entregar l’escritu y les cartes.