Los profesionales nun ven la TV n'asturianu

La revista "Imagen y Comunicación" ye una publicación pa los profesionales gallegos y asturianos del sector del vídeo, la tv y la publicidá en toles sos estayes. Esta revista que lleva editándose dende va tres años inclúi nel so númberu d'avientu una encuesta a empresarios y responsables públicos del sector sobre la futura tv autonómica. Anque la encuesta presenta los errores y faltes de cualquier encuesta, sobremanera cuando l'universu ye de namás 98 encuestaos como ye'l casu, nun dexa d'aportar datos pa ver como atalanten la presencia del asturianu na tv persones que van ser actores destacaos nel so nacimientu y evolución.

La encuesta, fecha a últimos de payares a un total de 98 directivos d'empreses particulares del audiovisual y a cargos públicos rellacionaos cola tv, incluyía dos entrugues sobre l'asturianu. A la primera "¿Como cree usté que debería emplegar l'asturianu (bable nel orixinal) la futura Televisión Autonómica?" proponíense cuatro rempuestes-tipu: la primera "debería emplegalo en dellos programes" marcáronla el 53% de los encuestaos, mientres que'l 41% tiró pola segunda opción "debería emplegala namás que en programes de cultura asturiana". Un 6% foron de la opinión de que l'asturianu "nun tendría qu'emplegase nunca o casi nunca" y el 0% apostó pola tv n'asturianu dafechu. La segunda entruga "¿Cree usté que les películes de cine tendríen d'emitise doblaes al asturianu?" dexó un resultáu más radical: el 93% dixo que non, y el 7% que sí. Llama l'atención que naide nun escoyere la tercer opción, el socorríu "nun sabe/nun respuende".