Los profesionales de la normalización llingüística denuncien les condiciones de convocatoria d'una plaza pal serviciu de Llangréu

L'Asociación de Trabayadores de la Normalización Llingüística emitió ayeri un comunicáu en que denuncia les condiciones en que se convocó una plaza pal serviciu de normalización llingüística de Llangréu. Al dicir de la plataforma de trabayadores d'oficines y servicios de normalización del asturianu, la convocatoria llangreana amuesa "la falta de planificación y compromisu pa cola normalización llingüística" por parte del Gobiernu del Principáu d'Asturies y los Conceyos.

Ente les denuncies de la plataforma apaez que la plaza salió a concursu nel mes d'abril "polo que nun se cubrirá hasta mayu nel meyor de los casos, dexando pasar mediu añu pa cubrir un puestu que si se quier trabayar con unos mínimos de seriedá nunca nun pue tener estos lapsus de tiempu que namás impliquen precariedá pal desendolque del trabayu y pa les condiciones llaborales del responsable del serviciu". El fechu de que la plaza sía de media xornada "cuando nos cuatro años nos que tuvo furrulando'l serviciu yera a xornada completa" amuesa pa los trabayadores de la normalización "poca voluntá política" sobremanera teniendo en cuenta que la plaza de Llangréu foi de xornal completu otros años.

Les pruebes de selección merecen la crítica más dura de l'asociación, que denuncia que la convocatoria "nun cumple los mínimos esixíos pa cubrir nenguna plaza de téunicu nun conceyu". La inesistencia d'un temariu concretu, como se propón dende l'asociación, y el fechu de que delles prebes sían tan poco afechisques al paecer de los profesionales como la consistente en facer un exerciciu de redacción lleva a l'Asociación a condenar el criteriu pol que se mandó Llangréu pa preparar esta plaza, pero tamién a la Conseyería de Cultura, Comunicación y Turismu "pola so falta de criteriu a la hora de conceder subvenciones pa cubrir estes places" que tienen de ser "más qu'un adornu pa cubrir l'espediente". L'asociación recuerda que la Conseyería tien "la responsabilidá de marcar unos mínimos de condiciones y facer un siguimientu claru y puntual de pa ónde y pa qué van les perres que concede vía subvención" y asegura que "hasta'l momentu ye costatable qu'esto nun se vien faciendo".

L'Asociación profesional denuncia qu'hai agravios comparativos poles estremaes condiciones en que se va facer el serviciu normalizador en cada casu concretu y afirma que si'l casu de Llangréu "ye preocupante", en Mieres "nin siquieramente se sabe si va haber serviciu esti añu, cuántos meses, en qué condiciones llaborables, si se va devolver la subvención, nin quién ta diseñando la política llingüística del conceyu".