Los profesionales de la llingua denuncien l'actuación del Gobiernu

Tres de la denuncia de la Xunta Pola Defensa de la Llingua Asturiana, qu'alvirtiere la otra selmana que'l Gobiernu asturianu taba retirando la rotulación n'asturianu de les conseyeríes y edificios públicos que la teníen, esta selmana ye l'Asociación de Trabayadores de la Normalización Llingüística emitió un comunicáu en que declara la so "indignación" cola "falta de respetu del gobiernu asturianu coles últimes midíes que ta tomando col asturianu".

L'asociación de profesionales de la normalización llamenta que "ta acabándose colo poco que se fexo na llexislatura anterior respecto a la señalítica billingüe n'asturianu" y acusa al gobiernu d'Asturies de "engañar a la sociedá cuando diz que ta a favor de mirar pol asturianu y respetar el so usu y lo primero que fai ye rerirar les señales y impresos billingües qu'había nes dos úniques conseyeríes nes que l'asturianu tenía una presencia mínima anque fuera ruina".

Los profesionales califiquen de "peligrosos y contradictorios" los primeros pasos de la Conseyera de Bienestar Social Pilar Rodríguez, que diz que ta "suprimiendo documentación qu'hasta agora apaecía nos dos idiomes" acabando coles poquesmidíes qu'apostaben dende'l gobiernu por da-y una presencia tresversal al asturianu. El colectivu afirma que "Estes coses demuestren claramente que l'oxetivu inmediatu d'esti gobiernu ye echar abaxo cualquier presencia de la llingua asturiana p'acabar col asturianu d'una vez por toes" y concluye que "por eso cuando falen de que la oficialidá nun ye necesaria y qu'ellos tán a favor de la protección nun busquen más qu'enriedar y engañar a la sociedá".