Los productos de 'Alimentos del Paraíso Natural', nel madrilanu XXXIV Salón Gourmets

Asturies cuenta con un puestu propiu na feria que se celebra ente'l llunes y el xueves.

L'espaciu espositivu que'l Gobiernu instaló n'IFEMA Madrid pal XXXIV Salón Gourmets, una de les feries d'alimentación y bébores de calidá más importantes del continente, ta a disposición de les empreses pa la promoción y divulgación de los productos agroalimentarios que formen parte de la marca 'Alimentos del Paraíso'. D'esta forma, estes marques pueden dase a conocer tanto a nivel estatal como européu y ampliar el so mercáu.

Nestos díes el stand asturianu va acoyer aiciones gastronómiques, como demostraciones, talleres, amueses de cocina y prebes en direuto. Na axenda d'actividades rescampla la presentación de conserves de pescáu d'Asturies; les combinaciones de quesos asturianos con sidra, del choscu de Tinéu con vinu de Cangas o de miel con quesos Afuega'l Pitu y Casín; y ellaboraciones de fabada col so compangu o de xata ecolóxica y vacunu mayor.

Na semeya, Alejandro Calvo, conseyeru de Mediu Rural y Cohesión Territorial, ayeri a la derecha de la imaxe nuna preba de sidra y quesos nel puestu d'Asturies xunto con Begoña López Fernández, direutora xeneral de Desarrollu Rural y Agroalimentación, y Samuel Trabanco, de Sidra Trabanco.