Los problemes pola falta de profesor de Llingua Asturiana siguen un cursu más nos colexos Santiago Apóstol y Aniceto Sela

|
CP Aniceto Sela

Los escolinos d’Infantil de los colexos mierenses Santiago Apóstol y Aniceto Sela nun reciben Llingua Asturiana magar la demanda de les families. El Sindicatu Unitariu Autónomu de Trabayadores de la Enseñanza d’Asturies (SUATEA) denuncia esta situación y alerta de los problemes que se viven tamién n’occidente, ensin profesoráu en Grandas de Salime de Gallego-asturiano a esta altura del cursu.

Per estes mesmes feches, el sindicatu educativu denunciaba la situación del CP Santiago Apóstol, ensin enseñu d’asturianu n’Infantil al contar con un únicu maestru a media xornada que namái permitía cubrir les clases de Primaria, polo que la direición del centru reclamaba l’ampliación del contratu a tiempu completu. “Esti cursu 2022/23 siguen pel mesmu camín: con cuasi’l 100 por cientu del alumnáu demandando l’asturianu nun se dota con profesoráu pa impartir estos conteníos”, alerta.

Nel casu del CP Aniceto Sela, nel 20/21 a los dos meses del entamu de les clases siguíen ensin profesor de Llingua Asturiana p’atender a parte del alumnáu de Primaria y a la totalidá del d’Educación Infantil. La situación iguóse depués de trés meses d’espera, pero esti cursu torna a repitise la falta d’atención d’esta demanda educativa.

“Esta forma d’actuar de la Conseyería d’Educación, nun dotando del profesoráu especialista necesario p’atender la demanda de la enseñanza d’Asturianu na Educación Infantil, ye sistemática, va xeneralízándose añu tres añu y ye contraria a derechu”, critica’l SUATEA, qu’asegura que “atiende esclusivamente a criterios economicistes de recortes nel gastu a costa de los derechos de los padres y madres”. Recuerden que vulnera dafechu la Llei d’Usu y Promoción del Bable/Asturianu del 1998 y l’Estatutu d’Autonomía.

Ausencia del asturianu nel currículu nuevu d’Infantil

“Tan sistemáticu ye’l frayamientu de los nuestros derechos llingüísticos y l’incumplimientu de les nuestres lleis, que l’acabante espublizar currículu d’Educación Infantil nun recueye ningún conteníu referíu a les nuestres llingües patrimoniales. Esta ausencia curricular supón amás una ruptura drástica na transición de la llingua materno-ambiental a la institucional-escolar con bultables consecuencies negatives nel procesu de deprendimientu, nel procesu de recuperación llingüística y na falta de continuidá nos conteníos ente la etapa Educación Infantil y Primaria”, añaden.

Una situación que llevó a SUATEA a interponer una demanda xudicial contra’l Decretu 56/2022, de 5 d’agostu, pol que se regula la ordenación y s’establez el currículu de la educación Infantil nel Principáu d’Asturies “esperando seya atendida y la Conseyería d’Educación modifique esti decretu pa que respete los nuestros derechos llingüísticos”. Mientres, esixe “la inmediata dotación de profesoráu de Llingua Asturiana nos centros mierenses Santiago Apóstol y Aniceto Sela pa que l’alumnáu d’Educación Infantil pueda recibir eses enseñances”.

Tamién nel Navia-Eo

El sindicatu educativu tamién quier llamar l’atención de los problemes que se vienen repitiendo añu tres añu nel occidente. Asina, asegura que la escuela de Grandas de Salime nun recibió entovía profesor de Gallego-asturiano, mentes que nel IES de Navia cubrióse’l puestu la selmana pasada.

Na semeya, CP Aniceto Sela.

Contador Estadistiques