Los principales líderes sindicales sofiten la manifestación pola oficialidá del sábadu

|
Los principales líderes sindicales sofiten la manifestación pola oficialidá del sábadu

La Xunta pola Defensa de la Llingua Asturiana (XDLA) sigue recibiendo sofitos pa la manifestación ‘L’asturianu llingua oficial ¡agora!’ del sábadu, destacando’l de los principales líderes sindicales del país. “Esta situación ye exemplu del cambiu xeneracional y de la llegada d'una fornada nueva de dirixentes que nun lleven al llombu los prexuicios de la xeneración anterior”, afirma la organización.

José Manuel Zapico, secretariu xeneral de Comisiones Obreres (CC OO), foi’l primeru del que se difundió una semeya xunto con dellos compañeros na que suxetaba una cartelu de la convocatoria del sábadu, al que siguieron Begoña Díaz-Penedo, secretaria d’Organización de la Unión Sindical Obrera (USO) y Javier Fernández Lanero y Maximina Fernández, cabezaleros de la Unión Xeneral de Trabayadores (UXT) y de la so federación d’enseñanza FETE-UXT, al igual que los del Sindicatu Unitariu Autónomu de Trabayadores de la Enseñanza d’Asturies (SUATEA), de la Confederación Intersindical y de la executiva de la Corriente Sindical d’Izquierda (CSI). L’últimu líder sindical que se suma a esta llista ye José Luis Alperi, secretariu xeneral del SOMA.

“El 21 d'abril que vien, les cais d'Uviéu van ser testigos d'una manifestación masiva a favor de la oficialidá de la llingua asturiana y del gallego-asturianu qu'entama la Xunta pola Defensa de la Llingua Asturiana”, apunta la organización cívica, que destaca’l relevu xeneracional y el cambiu de mentalidá nos dirixentes de dalgunes centrales sindicales. Una situación que tamién se da na sociedá asturiana “como muestren toles encuestes y como vamos demostrar, otra vuelta, esti sábadu 21 d'abril n'Uviéu”, marcha con salida a les 12 hores de la Estación del Norte (RENFE).

Contador Estadistiques