Los primeros datos del III Estudiu Sociollinguísticu d’Asturies anunciaránse nes selmanes próximes

El mes de xunu ye la fecha que se manexa pa la espublización de los primeros datos del III Estudiu Sociollingüísticu d’Asturies, encargáu pola ALLA a Francisco José Llera Ramos. El caderalgu de Ciencia Política foi ún de los compareciente de la sesta sesión de la Comisión Especial d’Estudiu sobre'l Réxime de Proteición y Promoción del Asturianu na Xunta Xeneral.

Xunto col caderalgu de Ciencia Política, intervinieron nesta ocasión Xabiel González Menéndez, presidente de Xeira; José Manuel Pérez Fernández, lletráu del Tribunal Constitucional y profesor titular de Derechu Alministrativo de la Universidá d’Uviéu; l’espertu gastronómicu Lluis Nel Estrada; el biólogu Bertu Ordiales; el sacerdote José Manuel García de Jesús ‘Pin’, presidente del Coleutivu Manuel Fernández de Castro; Carlos Pulgar, voceru nacional de la Xunta pola Defensa de la Llingua Asturiana (XDLA); Fernando Álvarez-Balbuena, vicepresidente de l’asociación El Teixu-Rede pal Estudiu y Defensa de la Llingua Asturllionesa; y Penélope Miranda, vocera de l’Asociación de Trabayadores de la Normalización Llingüística. Nesta ocasión tuvieron representaos toles formaciones polítiques, anque’l del PP s’ausentó mientres una bona parte de la sesión.

Llera apuntó na so intervención que pronto van conocese los primeros datos del III Estudiu Sociollingüísticu d’Asturies. Nesi sen, esta tarde va aconceyar con a Ana María Cano y Xosé Antón González Riaño, presidenta y vicepresidente de l’Academia de la Llingua Asturiana (ALLA), pa falar d’esti asuntu y definir la fecha na que se van dar los primeros avances de dichu estudiu, previsiblemente nel mes de xunu. L'últimu espublizóse nel 2002, siendo'l primeru del 1994.

Na so intervención na comisión del asturianu, el caderalgu señaló que “perder una llingua ye la erosión de parte del conocimientu humanu” y, nesi sen, que “la proteición d'una llingua ye obligación ineludible d'un grupu humanu”. Lo único debatible sería “cómo protexela, y eso ye cuestión de voluntá política”. Lo que sí ve necesario, como yá s’apuntara n’anteriores comparecencies, ye “un consensu” pa poder avanzar.

Optimista col futuru del idioma, Llera esplicó que “tamos meyor n'habilidaes llingüístiques, pero peor n'identificación llingüística (normalización social,espaciu públicu del idioma)”. D’igual forma, afirmó que “pa dar un saltu cualitativu hai que facer les coses de manera distinta”.

Gallego-asturiano

L’encargáu d’abrir la sesión foi González Menéndez, que tuvo qu’ausentase tres la so intervención. Nella apuntó que "la situación é dramática", tanto pal gallego-asturiano como pal asturianu, y llamentó qu’enantes “os nenos y os bolos falaben. Agora os bolos charren y os nenos non falen gallego-asturiano”. Pa iguar esta situación, a parte de la oficialidá, señaló a la escolarización, l’emplegu del idioma nos medios de comunicación y n’empreses, sobre manera nes agroalimentaries.

Pérez Fernández, pela so parte, calificó la situación del asturianu y el gallego-asturiano como "anómala" y afirmó que la oficialidá ye’l primer pasu pa salvar esta “anomalía”. Una vegada algamada la oficialidá, “el siguiente pasu sería modular l'algame d'esa declaración", pa lo que fadría falta "una Llei de Normalización", aseguró.

Na so opinión, ésa sería la única manera de “garantizar los derechos llingüísticos, la pervivencia del idioma y una progresiva equiparación de los derechos llingüísticos”. Darréu puntualizó que "la oficialidá nun lo soluciona too", y que mientres llega hai que tomar midíes pa sacar al asturianu de la situación marxinal na que ta.

Otra manera, entrugáu por Andrés Fernández Vilanova 'Ron', representante de Podemos, sobre la especialidá docente, aseguró que "ye una cuestión de voluntá política. Xurídicamente nun hai nada qu'impida la creación de la especialidá docente". Nesi momentu yá taba ausente’l representante del PP, dalgo que llamentó Pérez Fernández.

Marca de calidá: oficialidá

Estrada comparó l’asturianu como un productu de calidá que, como tal, necesita una marca de calidá que-y dea garantíes. “Y esa marca de calidá ye la oficialidá”, afirmó.

"Ensin oficialidá, l'asturianu nun tien futuru y acabará desapaeciendo, como fadría'l Cabrales ensin la Denominación d’Orixe”, especificó’l cocineru, qu’entiende que’l sector agroalimentariu y la gastronomía asturiana nun se pueden entender si nun ye n'asturianu". Al respeuto aseguró que “el turista ye'l que menos s'estraña d'atopar una carta n'asturianu. Ve qu'hai una cultura detrás".

La ciencia centró’l discursu d’Ordiales, que s’entrugó "¿Por qué perder esta riqueza?", en referencia al asturianu, una llingua que considera que “pue apurrir a la ciencia”. "La non oficialidá ye una prohibición inconcebible", siguió’l biólogu na so intervención.

Derechos Humanos

El cura Pin amosó’l so esmolecimientu porque entiende que l'asturianu va hacia "el desaniciu dafichu". "Ye un motivu de preocupación dende l'humanismu cristianu", añadió, refiriéndose siempre a los Derechos Humanos. "La primer de les midíes ha de ser la oficialidá", aseguró’l sacerdote, que la considera "non condición suficiente, pero sí condición necesaria".

Pela so parte, Pulgar afirmó que "nun hai solución” a la situación del idioma “ensin oficialidá" y dirixóse a los diputaos reclamando que "nun ye momentu de pidir, sinón de de decidir cómo será esa oficialidá". Al respeuto, recordó-yos el ‘Proyeutu 2018 pa la Oficialidá’ col que la XDLA pretende abrir un procesu de reforma del Estatutu. “Tien que ser agora. Nun se sostién esta situación más tiempu", finó

El desaniciu, política llingüística

Álvarez-Balbuena foi’l más críticu de tolos presentes al apuntar que “la política llingüística realmente esiste y tien ésitos y tamién limitaciones. L’ésitu ye que tuvo unos resultaos magníficos y el fracasu, que naide vamos ver la muerte del asturianu, del asturlleonés”. Y ye que, afirmó, “ési ye l’oxetivu de la  política llingüística”.

Tres analizar dicha “política d’erradicación”, nel turnu d’entrugues apuntó como solución “problematizar la suerte del asturianu", esto ye, facer ver que la so sobrevivencia ye un problema grave. Ente los asuntos más llaceriosos, destacó la perda de la tremisión xeneracional.

La última n’intervenir foi Miranda, que centró les sos pallabres na situación de los Servicios de Normalización Llingüística. Cifró en 15 los activos anguaños en 26 conceyos, pa depués calificar la política llingüística de “probe” y criticar que se centre sobre manera nel ámbitu cultural y lliterariu.

"Nun se corrixen los errores que-yos treslladamos", añadió, pa falar después de la insostenibilidá llaboral, les inxerencies y la mala xestión de los equipos de gobiernu municipal como principales problemes de los SNL. Tamién echó culpa al Executivu, al que criticó, ente otros motivos, por nun llevar un control de los mesmos.

"L'estatus xurídicu qu'equipara a les llingües ye la oficialidá, pero fai falta tamién una Llei de Normalización que la desenvuelva", finó Miranda, que demandó "axuntar esfuercios y non francer una riqueza patrimonial de tolos asturianos".

Entrugues de trés diputaos

Ron, Concha Masa (Izquierda Xunida) y Nicanor García (Ciudadanos) foron los únicos diputaos qu’exercieron la posibilidá d’entrugar a los comparecientes. Na so intervención, García señaló tar d’alcuerdu coles pallabres de Llera de que "la llingua ye un vehículu de comunicación y patrimoniu del pueblu que la fala, non d'un territoriu”.

Na cuenta de Twitter d’Asturies.com comentamos en direuto tola sesión. Calcando nesti enllaz pue consultar cómo se desendolcó la mesma minutu a minutu y conocer les declaraciones principales de los comparecientes y representantes políticos.

Na semeya, Llera Ramos y Pérez Fernández.