Los Presupuestos del 2023 apruébense col apoyu de 27 diputaos al votar tamién a favor Podemos

La FSA algamó l’apoyu de los dos partíos de la izquierda, Podemos y Asturies pela Izquierda (IX-IAS), na aprobación definitiva de les cuentes, amás de la del únicu diputáu del grupu mestu, ex de Ciudadanos, Luis Armando Fernández Bartolomé. Les bases de la formación morada dieron el so preste a sofitar les cuentes al rexistrar un 70 por cientu favoratible ente los participantes nuna consulta.

El Plenu de la Xunta Xeneral d’esta mañana, nel que se votaron les enmiendes parciales presentaes polos grupos parllamentarios, aprobó la Llei del Principáu d’Asturies de Presupuestos Xenerales del 2023, que va manexar 5.968 millones d’euros, la cantidá más alta de la historia, de los que 2.535.701 euros, un 0,04 por cientu del total, va destinase a la promoción del asturianu. 27 diputaos posicionáronse a favor de les cuentes, los de la FSA, Podemos, IX y Fernández Bartolomé, mentes que 18 opunxéronse, los del PP, Ciudadanos, Foro y VOX.

Los 23 yá confirmaos suficientes pa l’aprobación de los Presupuestos qu’aseguraben los 20 socialistes, los 2 de la coalición y el del grupu mestu torgaron toles enmiendes parciales, 271, inclusive les de Podemos, qu’ayeri comunicaba’l so apoyu a les cuentes depués d’una consulta a les bases. Votaron un total de 295 persones, de los que 209 posicionáronse a favor, 69 en contra y 17 astenciones.

Éstos son los cuartos presupuestos que saca alantre’l presidente Adrián Barbón, tolos d’esta llexislatura, que fina en mayu. L’añu pasáu fixéralo col apoyu d’IX y Ciudadanos.

Na semeya, Barbón mira p'atrás dende'l so escañu pa ver na pantalla el resultáu de la votación del dictame.