Los Premios Lliterarios y el Nel Amaro entréguense nel Muséu Arqueolóxicu

La gala va tar presidida pola conseyera Piñán.

El Muséu Arqueolóxicu d’Asturies, n’Uviéu, va acoyer la entrega de los Premios Lliterarios 2019 y el III Premiu y Festival Nel Amaro de Teatru Profesional en Llingua Asturiana o Gallego-asturiano. Va ser mañana a les 19 hores nel salón d'actos.

Los premiaos d'esti añu son Francisco 'Paco' Álvarez (XL Premiu Xosefa Xovellanos de novela por 'Los xardinos de la lluna'), Gonzalo González Barreñada (XXV Premiu Xuan María Acebal de Poesía por 'El llar n’orde'), José Ángel Gayol (XXV Premiu Máximo Fuertes Acevedo d'ensayu por 'El silenciu invisible') y Ruma Barbero (XI Premiu Alfonso Iglesias de cómic por 'Seltegu'). Mentes, Factoría Norte lleva'l gallardón de teatru por 'Les rellaciones peligroses'.

Toos ellos van recibir una pieza artística "en reconocencia a la calidá de la so obra y la so significación como aportación a la creación lliteraria en llingua asturiana". La gala va cuntar amás cola actuación musical de Mario Bernardo y Cristina Gestido.