Los Premios Lliterarios aumenten la so recompensa de 3.000 a 5.000 euros

La Conseyería d’Educación y Cultura ta acabante de convocar la edición del 2019 de los Premios Lliterarios, asina como del Nel Amaro de teatru. La novedá d’esti añu ye l’aumentu de les recompenses nos cincos gallardones, que pasen de 3.000 a 5.000 euros, mentes que se caltién nel d’obres dramátiques.

El Boletín Oficial del Principáu d’Asturies (BOPA) de güei anuncia la convocatoria d’esta iniciativa que nació nel 1980 col Primer Concursu de Narraciones Curties Diputación d’Asturies, agora Xosefa Xovellanos, y que foi incorporando otros xéneros, l’últimu’l de teatru hai 2 años. Asina, vivimos la cuarenta edición del de novela, la ventenu quinta del Xuan María Acebal de poesía y del Máximo Fuertes Acevedo d’ensayu, la decimosegunda del María Xosefa Canellada de lliteratura infantil y xuvenil, la undécima del Alfonso Iglesias de cómic, y la tercera del Nel Amaro de teatru profesional n’asturianu o gallego-asturiano, que s'espublizó ayeri.

Los ganadores de los Premios Lliterarios van recibir una recompensa de 5.000 euros, 2.000 euros más que na convocatoria pasada, mentes que’l Nel Amaro caltién la de 6.000 euros. El plazu de presentación pa esti últimu fina’l 3 de xunetu y los finalistes d’esti gallardón van participar nel III Festival de Teatru Nel Amaro, que se va celebrar nel Teatru Filarmónica d’Uviéu los díes 8, 15, 22 y 29 de payares, onde van defender enriba l’escenariu les obres teatrales qu’opten al premiu.

El plazu de presentación d’orixinales pal restu de gallardones acaba’l 16 de setiembre, a esceición del de cómic, que termina’l 2 d’esi mesmu mes. El fallu de los ganadores va conoces nos meses últimos del añu.

Na semeya, un momentu de la gala d'entrega de los Premios Lliterarios 2018 celebrada nel Edificiu Históricu de la Universidá d'Uviéu.