Los premios AMAS lleven contabilizaos 40.000 votos

A falta de nueve díes pa la finalización del periodo de votación de los Premios AMAS al traviés d’Internet, la web del Anuariu de la Música Asturiana lleva contabilizaes 40.000 participaciones. La gala de los AMAS va celebrase’l 4 de marzu nel Filarmónica.
 
Estes cifres espectaculares son una muestra del ésitu d’esta convocatoria que nació pa promocionar l’anuariu, publicación que recueye tola actividá musical rexistrada n'Asturies a lo llargo del 2010 en tolos xéneros, a excepción de la música coral y la clásica, y qu’inclúi dos compact disc: ún con 16 temes recopilatorios y otru con dellos videoclips y grabaciones en directo. Too ello por diez euros. David Serna, coordinador de los premios del Anuariu de la Música Asturiana, destacó nel actu del presentación de la revista, a la que tamién acudió Jorge Fernández León, viceconseyeru de Cultura, la relevancia grande que garraron los premios hasta’l puntu de “absorber” al propiu anuariu.
 
El plazu pa votar nes 20 categoríes nos que se dividen los Premios AMAS fina’l 18 de febreru a les 00 hores. El 4 de marzu, na gala del Filarmónica, la organización va entregar los premios a los músicos escoyíos polos internautes, amás de los tres honoríficos decidíos pola redacción del anuariu, que nesta ocasión van ser pal cantante Víctor Manuel, l’artesanu constructor de gaites Alberto Fernández Velasco y pal festival Derrame Rock.