Los planes del Gobiernu pa col asturianu

Asturies.com presenta les respuestes del conseyeru Genaro Alonso a Izquierda Xunida (IX) sobre los sos planes pa col asturianu.

Son les siguientes:

“Sobre la llingua asturiana, la creación d’una comisión d’estudiu sobre’l rexime de proteición del asturianu y les sos distintes alternatives ye competencia de la Xunta Xeneral del Principáu d’Asturies y ta siguiendo’l trámite parllamentariu correspondiente.

Recién dictóse la Resolución de la Xunta Xeneral del Principáu d’Asturies 20/ X, de 16 d’ochobre del 2015, adoptada pol Plenu, sobre la presentación d’un Plan de Dignificación de la Llingua Asturiana.

La ellaboración y desarrollu del Plan de Dignificación supondrá una meyora sustancial del desarrollu de la Llei d’Usu y Promoción del asturianu, asina como’l reforzamientu de la so implantación, favoreciendo la normalización y utilización por parte de les alministraciones, l’usu institucional, los medios de comunicación, l’ámbitu educativu y editorial.

El Decretu 65/2015, de 13 d’agostu, pol que s’afita la estructura orgánica básica de la Conseyería d’Educación y Cultura, modifica sustancialmente les funciones y estructura de la Direición Xeneral de Planificación Llingüística y Normalización pasando a depender de forma direuta de la persona titular de la Conseyería d’Educación y Cultura, fortaleciendo’l nivel institucional de la política llingüística.

Nel anteproyeutu de presupuestos presentáu pola Direición Xeneral de Planificación Llingüística y Normalización, y a falta de la so aprobación polos órganos correspondientes, establezse un incrementu de más del 50 por cientu na tresferencia pa la financiación de l’Academia de la Llingua Asturiana.

Dende la Direición Xeneral de Planificación Llingüística y Normalización, sicasí, tán tomándose una serie de midíes encaminaes al procesu de normalización llingüística, dalgunes derivaes y comprometíes colos responsables anteriores de la Direición Xeneral y otres de nueva iniciativa.

Cola fin d’adaptar les distintes convocatories de subvenciones a la realidá social d’Asturies, tán realizándose reuniones colos distintos sectores implicaos, medios de comunicación, editoriales y músicos, etc.

Continuar col procesu d’oficialización de la toponimia tradicional. Fixéronse los nomamientos pertinentes de los miembros nuevos de la Xunta Asesora de Toponimia y próximamente convocaráse a la mesma pa continuar col so llabor de propuesta y aprobación d’espedientes toponímicos. Anguaño hai 53 conceyos colos espedientes aprobaos y espublizaos en BOPA, 17 con espediente abiertu y en fase d’aprobación y 8 pendientes de solicitú.

Realización de les convocatories de subvenciones pa normalización, previstes pal 2015.

Coordinación del procesu d’enseñu de l’asignatura de Llingua Asturiana y Lliteratura. Contautu permanente colos centros que lo soliciten pa la solución de problemes posibles plantegaos nel procesu d’escolarización y repartu de material bibliográficu.

Programación de distintes actividaes de normalización llingüística pa facer enantes de fin d’añu: campaña de publicidá, promoción y visualización de la llingua asturiana n’ambientes deportivos, propuesta de programación d’otres actividaes ensin especificar (música, lliteratua, etcétera).

Pluralismu informativu y cultural na RTPA

N’otra entruga plantegada por IX sobre’l “pluralismu informativu y cultural na radio y televisión públiques”, la respuesta del conseyeru ye la siguiente: “No que respeuta al pluralismu informativu y cultural na radio y televisión públiques asturianes, la Conseyería d’Educación y Cultura ta a la espera del nomamientu del Conseyu d’Alministración de la RTPA y del direutor del ente pa facer un plantegamientu sobre’l tratamiento de la llingua asturiana na radiotelevisión pública”.