Los pinchos tomen los chigres de Samartín

Un total de 28 establecimientos hosteleros de Sotrondio, Blimea y L'Entregu participen nel VIII Samartín del Pinchu, eventu gastronómicu col asturianu como llingua vehicular.

'Bocáu de zamburiñes', 'Cuadra y viesca', 'Saquín de centollu' y 'Cazuela de campu' son dalgunes de les creaciones que se presenten esti añu a concursu, qu'atrae a cientos de persones a Samartín del Rei Aurelio pa disfrutar d'estes delicies que tienen un preciu de 2,50 euros, cola promoción d'un pinchu y una San Miguel por 4,10 euros. Empresario y Comerciantes de San Martín del Rei Aurelio (ECOSAM) entama esta iniciativa que vien siendo añu tres añu un ésitu, al igual que la so hermana 'Samartín de les Tortielles'.

Dambos eventos destaquen por utilizar l'asturianu como llingua vehicular na información del mesmu, tanto na cartelería como nos 3.000 gastromapes repartíos. Nesti sen, ECOSAM tuvo cuntando col asesoramientu de la Oficina de Política Llingüística de Samartín del Rei Aurelio tolos años pasaos.

Pa consultar el gastromapa y preparar les rutes polos chigres que participen en 'Samartín del Pinchu', calque equí. Este certame gastronómicu comienza güei y va allargase hasta'l domingu.