Los pescadores de Cuideiru viven la so tercer xornada de protestes pol pieslle de la costera de xarda

Dos centenares de pescadores de Cuideiru cortaron per tercer xornada consecutiva la carretera N-632 a l’altura de Las Dueñas. Protesten asina pol pieslle anticipáu de la costera de xarda que dexa al seutor pesqueru cantábricu nuna situación difícil.
 
Una barricada de neumáticos en llames impidió’l tráficu na zona ente les 7 y les 8 la mañana nuna xornada na qu’intervinieron los antidisturbios contra los pescadores, que reclamen una costera de la xarda “digna”. Dende la Cofradía de Pescadores de Cuideiru consideren que la situación tres el pieslle del permisu pa la pesca d’esti pexe ye “desastrosa” y anuncien que seguiran movilizándose “hasta les consecuencies últimes”.
 
La cuota de xarda asignada esti añu al Cantábricu foi de 24.644 toneladas, de les que l’ Estáu tuvo que deducir 4.500 toneladas por una sanción comunitaria polos escesos de captures del 2010. Esti xueves hai una xunta en Madrid na que va participar el presidente de les cofradíes pesqueres d'Asturies, Dimas García, y el direutor xeneral de Pesca, José Marcelino Menéndez Cuervo, xunto con representantes del Ministeriu de Mediu Ambiente, Mediu Rural y Marín na que s’espera “un compromisu claru” por parte del ministeriu pa pelear en Bruxelles/Brussel polos intereses de los profesionales de la pesca, qu’insisten na necesidá d’una ampliación de cuota pa la campaña del 2012.
 
L’esmolecimientu pola situación nun se da namái n’Asturies, sinón tamién en Cantabria y Galicia. Miguel Ángel Revilla, presidente cántabru, anunció que va unviar una carta a la comisaria europea de Pesca, Maria Damanaki, pa mostra-y el so convencimientu de que nun se tien que caltener el cupu de captures de xarda impuestu nestos momentos pola Xunión Europea por cuenta de la bayura qu'hai agora nel Cantábricu d'esti pexe.