Los partíos pequeños tienen la llave pa gobernar Alemaña

Alemaña celebró ayeri les elecciones más apertaes de la so historia. Nelles, la conservadora Angela Merkel (CDU / CSU) consiguió'l 35,5% de los votos, que-y dan a la so formación política 225 escaños, un resultáu que prácticamente empata'l SPD de Gerhard Schröder col 34.3% de les papeletes. Con ello, la llave del gobiernu n'Alemaña repártese agora ente los lliberales, aliaos naturales de los conservadores y que tienen 61 escaños, mientres que los socialistes puen pactar colos Verdes, que disponen tres de les elecciones d'ayeri de 51 asientos, mientres que toos descarten públicamente por radical la opción del partíu d'izquierda PDS, que tien 54 escaños. La otra opción diba ser una coalición grande ente les dos fuerces mayoritaries, cosa que yá se dio n'Alemaña nos años 60, anque nesi casu nun se sabe quien de los dos candidatos diba ser canciller.

Lo que ye'l peor resultáu de los socialistes alemanes en décades quedó tapecíu gracies a que'l partíu de Schroder mengüó na votación les diferiencies d'escándalu a favor de la CDU/CSU que daben les encuestes y ello ye que'l SPD atropó bien de votu nos lander de l'antigua Alemaña del este y nel norte, mientres que la coalición conservadora tuvo más fuerza en terrén de l'antigua RFA, nel sur y el oeste. Col xuegu de les aliances abiertu, el ganador final de les elecciones ta entovía por sabese, en cuantes qu'esiste un distritu en Dresde onde se retrasaron les votaciones hasta la vuelta de quince díes pol fallecimientu d'un de los candidatos.
Titulares de prensa internacional: El País, Le Monde, LiberationBBC La Repubblica Die Welt Frankfurter Allgemeine