Los parllamentarios que nun renueven el so escañu van cobrar 2.814 euros mensuales per dos años

Los diputaos y senadores que, pola disolución de les Cortes, cesen del so cargu y nun renueven el so escañu’l 20-P, nun van marchar coles manes vacíes. Van recibir una indemnización per un máximu de dos años de 2.813,87 euros mensuales.  
 
Los 248 diputaos –el 70 por cientu del total– que causen baxa esti llunes cola disolución de les Cortes tienen garantizáu'l so salariu normal hasta'l 26 de setiembre y depués van recibir una paga única de ‘transición’ por cese d'actividá que va xubir a casi dos meses de sueldu equivalente a lo que percibiríen nestos 53 díes que medien dende la publicación del decretu hasta les eleiciones del 20 de payares. Los otros 102 restantes caltendránse n'activo como miembros titulares y suplentes de la Diputación Permanente del Congresu, l'únicu órganu parllamentariu que funciona nos periodos d'interllexislatures, polo que nun perciben nenguna indemnización de transición.
 
Celebraes les eleiciones, los diputaos y senadores que nun repitan escañu y que nun perciban nengún otru sueldu públicu van poder pidir una indemnización por cese, siempre que tuvieren nel Parllamentu un mínimu de dos años. Esi paru va ser l'equivalente a una mensualidá de l'asignación constitucional, fixada nel 2011 en 2.813,87 euros, por cada añu de mandatu y con un máximu de 24 meses. Esta prestación nun va abonase de golpe, sinón mes a mes pa dar tiempu a axustes y poder cesar l'abonu si hai un cambiu na situación llaboral del ex parllamentariu.
 
El Reglamentu de pensiones y proteición social de los parllamentarios modificóse'l pasáu mes de xunetu, ente otres coses, pa qu'esta indemnización por cese sía incompatible cola percepción de cualquier retribución, sueldu, salariu, pensión, dieta, indemnización o percepción de cualquier naturaleza, yá sía de calter públicu o priváu. Sicasí, esta reforma nun va empezar a aplicase hasta la llexislatura siguiente.