Los paradores de Xixón, Cangues y Courias reabren les sos puertes

Iniciativa pol Asturianu demanda'l cumplimientu de la toponimia oficial y anima a ufrir lliteratura asturiana a los visitantes.

Los 97 hoteles y espacios gastronómicos de Paradores reabren mañana les sos puertes depués de que se trancasen el 15 de marzu pola crisis sanitaria pola pandemia de COVID-19. N'Asturies, la empresa pública estatal cuenta con trés agospios, en Xixón, Cangues d'Onís y Courias.

Sicasí, en nengún se respeta la toponimia tradicional, la oficial nos trés conceyos onde s'asienten. Por eso, Iniciativa pol Asturianu, al traviés del so presidente Iván Llera, reclama'l so emplegu porque “ye importante normalizar l’usu de los topónimos tradiciones nestos espacios", dalgo que "nun va suponer nengún tipu de problema col visitante”.

Tamién propón ufiertar a los visitantes obres lliteraries n’asturianu nos espacios de descansu pa que los turistes puedan averáse a la nuesa lliteratura.

Na semeya, el Parador de Courias.