Los ocho conseyeros del Executivu de Javier Fernández tomen posesión de los sos cargos esti llunes

La Xunta Xeneral va acoyer, al meudía d’esti llunes, la toma de posesión de los ocho conseyeros que conformen l’Executivu de Javier Fernández. Pela tarde, a les 17 hores, va tener llugar la primer reunión del Conseyu de Gobiernu.
 
L’equipu de trabayu de Fernández va tar formáu por un conseyeru menos que’l de Francisco Álvarez-Cascos tres la decisión del socialista de fusionar Educación y Universidaes con Cultura y Deporte, cartera que va tar en manes d’Ana González, llicenciada en Filoloxía Hispánica y ex direutora del gabinete de la que fora ministra d’Igualdá, Bibiana Aído. El restu de responsables de les conseyeríes son Guillermo Martínez (Presidencia), Dolores Carcedo (Facienda), Graciano Torre (Economía y Emplegu), Esther Díaz (Bienestar Social y Vivienda), Faustino Blanco (Sanidá), Belén Fernández (Fomentu) y María Jesús Álvarez (Agroganadería). En total, cinco muyeres y trés homes.
 
L’actu de toma de posesión va principiar al meudía na sede de la Presidencia, onde los conseyeros llegaron alredor de les 08.45 hores. Tres xurar o prometer los cargos, l’equipu de Gobiernu nuevu va facer la semeya oficial na escalinata y, ente les 12.30 hores y les 14.50 hores, van tener llugar los intercambios de carteres nes sedes de les conseyeríes. Yá pela tarde, Fernández va aconceyar al Conseyu de Gobiernu a las 17 hores na sede de la Presidencia.