Los obispos, esmolecíos pola “desintegración unillateral" d’España

La CCXXV Comisión Permanente de la Conferencia Episcopal Española amosó la esmolición del obispáu pola “desintegración unillateral” d’España. Nuna declaración tamién llamaron al civismu ante los recortes del Gobiernu estatal.

"Nengún de los pueblos o rexones que formen parte del Estáu español podría entendese, tal que ye güei, si nun formara parte de la llarga historia de xunidá cultural y política d'esa antigua nación que ye España. Propuestes polítiques empuestes a la desintegración unillateral d'esta unidá cáusennos una gran esmolición", apunten los obispos citando un documentu aprobáu nel 2006 polos obispos sobre los nacionalismos que, al so xuiciu, "güei, na delicada situación de crisis qu'afecta a toos, preséntase con particular urxencia". Asina, anueven la la “llamada a la responsabilidá" respeuto del bien común d'España, que realizaron nesa declaración na que reconocíen, en principio, la llexitimidá de les postures nacionalistes verdaderamente cuidadoses del bien común y encamentaben "encarecidamente al diálogu ente tolos interlocutores políticu y social". "Tien de caltenese'l bien de la xunidá, coles mesmes qu'el de la rica diversidá de los pueblos d'España", añadíen los relixosos.

Amás, nel documentu presentáu güei sobre la crisis, los obispos amuesen la so "fonda esmolición" por quien más sufre les consecuencies –"les families, cuantimás, les numberoses, los mozos, los pequeños y medianos empresarios, los llabradores y ganaderos, les xentes del mar, los trabayadores y los inmigrantes, ente otros– y piden al Gobiernu del Estáu que los recortes nun recayan sobre los más débiles, "con especial atención a los inmigrantes, arbitrando más bien les midíes necesaries pa que reciban les ayudes sociales oportunes". Coles mesmes piden, "a quien correspuenda", que se dea "un signu d'esperanza a les families que nun pueden facer frente al pagu de les sos viviendes y son desallugaes". "Ye urxente atopar soluciones que dexen a eses families, igual que se fixo con otres instituciones sociales, facer frente a les sos deudes ensin tener que quedar na cai. Nun ye xusto que, nuna situación como la presente, resulte tan gravemente comprometíu l'exerciciu del derechu básicu d'una familia a disponer d'una vivienda", remarquen.

Otra manera, animen a que "el malestar social y políticu" sía "un reclamu a la busca sincera del bien común y al trabayu por construyilo ente toos" y llamen al civismu ante los recortes entamaos dende’l Gobiernu estatal.