Los niveles de contaminación del aire n'Asturies siguen siendo mayores que los permitíos por normativa

Llugones y la estación avilesina del mataderu superaron nel 2010 el valor mediu anual permitíu por normativa de presencia de partícules de suspensión PM10 nel aire. Ecoloxistes n’Aición denuncia la pasividá de les alministraciones.
 
L’informe ‘La calidad del aire en el Estado Español durante 2010’ de la organización ecoloxista, fechu a partir de los datos de los centros de medición de les comunidaes autónomes, desprende qu’un 87 por cientu de la población estatal respira aire que supera los índices recomendaos pola Organización Mundial de la Salú (OMS) y un 37 por cientu –más de 17 millones de persones–, los que marca la llexislación. Unos númberos que, por contra, nun lleva a les alministraciones a tomer midíes nesis sen, según denuncia Ecoloxistes n’Aición. Nel casu concretu d’Asturies, destaca la presencia de partícules en suspensión PM10 en tol territoriu, ún de los contaminantes más peligrosos pa la salú humana.
 
Asina, siendo’l máximu llegal de 40 miligramos por metru cúbicu, nel 2010 la estación de Llugones llegó a rexistrar de media 43 y, la d’Avilés asitiada nel mataderu, 42. D’igual forma, llegaron a superar esta cifra la estación avilesina de Llanoponte (69 superaciones) y la de l’avenía de l’Arxentina en Xixón (41 superaciones), siendo’l máximu permitíu al añu de 35.
 
Al igual que vieno asocediendo nel 2008 y 2009, nel añu 2010 rexistróse una reducción pequeña de los niveles de contaminación en comparanza con años precedentes, dalgo que, como vien apuntando Ecoloxistes n’Aición, ocurre “más por razones coyunturales que pola aplicación de midíes planificaes y orientaes a meyorar la calidá del aire”. Nel casu d’Asturies ye na contaminación polos óxidos d’azufre onde más se notó la meyora, “frutu del cambiu de modelu enerxéticu, con un menor usu de les centrales térmiques de carbón y de l’aplicación d’ameyoramientos teunolóxicos como les plantes desulfuradores”. De toes formas, pese a cumplir los valores máximos llegales, la situación ta lloñe de ser buena, con delles estaciones que superen el valor diariu recomendáu como máximo pola OMS de 20 miligramos por metru cúbicu, siendo la del mataderu d’Avilés la peor, con 59 superaciones.
 
“Ecoloxistes n’Aición quier destacar que la contaminación del aire ye un asunto mui grave: el Programa por un Aire Llimpiu n’Europa cifra en 19.940 el númberu de muertes prematures anuales nel Estado español y nunes 400.000 les persones que finen na Xunión Europea de los 25 cada añu por esta mesma causa. Pese a ello, les alministraciones nun tán tomando les midíes necesaries para solucionalo”, denuncien. Ente les propuestes de los ecoloxistes destaca la necesidá de reducir el tráficu, la necesidá de movilidá y la potenciación del tresporte públicu y el non motorizáu, asina como l’adopción xeneralizada de teunoloxía industrial pa la mengua de la contaminación en zones d’empreses del sector secundariu.