Los nabos, productu estrella en Sotrondio

Les xornaes festives compleméntense'l domingu cola XXIV Feria del Miel.

Más d'una docena d'establecimientos hosteleros de Sotrondio van ufrir el tradicional menú de la folixa gastronómica de los nabos hasta'l día 11. Ésti, que se pue disftrutar tanto na xinta como na cena, ta compuestu por pote de nabos acompañáu de chorizu, morciella, tocín y carne de gochu, platu al que sigue una una ración de callos. De postre sírvense casadielles.

Por motivu de la fiesta los nabos van entamase delles actividaes hasta'l miércoles nel llugar, ente elles dos verbenes na plaza Ramón y Cajal: una prevista pa esta nueche, cola orquesta Versión Original, y otra mañana, con Vivians. L'actu que va dar aniciu a los festexos va ser la entrega del Nabu d'Oru 2015 a Justo José Martínez García, a les 19.30 hores na carpa de Ramón y Cajal.

Otra manera, el domingu va celebrase la XXIV Feria del Miel na cancha cubierta del colexu Rei Aurelio. Nella van participar 14 espositores con miel y productos derivaos, asina como 22 puestinos d'alimentación y artesanía. L'horariu d'apertura va ser de 9.30 a 19 hores.