Los museos asturianos alléguense a les 500.000 visites

Con motivu de la celebración güei del Día Internacional de los Museos, el titular de Promoción Cultural y Política Llingüística Carlos Madera esclarió ayeri dellos proyectos y datos sobre la situación del panorama museísticu nel país, que s'amiesta a la xornada mundial baxo'llema "Museos y Patrimoniu inmaterial"

Madera adelantó que'l Principáu ta trabayando nuna nueva marca conxunta que, baxo la etiqueta "Museos de Asturias"enxertaría tola rede d'equipamientos culturales públicos, que yá cuenta con 15 museos, y los particulares que lo desearen, centralizando la vienda d'entraes pa los mesmos

Nel añu 2.003 los museos asturianos sumaron un total de 463.284 visites contra les 494.013 del 2.002, una pequeña mengua que se xustifica pol pieslle temporal de delles instalaciones, siendo otru añu más el Muséu de la Minería de L'Entregu'l líder de la rede pública asturiana de museos con 85.031 visitantes Los equipamientos rellacionaos cola arqueoloxía industrial tienen munchu ganchu pal públicu, anque l'otru gran equipamientu industrial, el Muséu del Ferrocarril de Xixón, rexistró una baxada importante de visites respective al 2.002.

El Muséu del Pueblu d'Asturies de Xixón, que bebe del turismu de la ciudá y el Belles Artes d'Uviéu, que, teniendo pendiente la obra d'ampliación y ensin disfrutar d'esposiciones temporales con ganchu, completaron el tríu de los museos más populares nel 2.003. Ente los equipamientos particulares con más visites rescamplen el Muséu del Palaciu Revillaxixéu de Xixón xestionáu por Caxastur y la Sala d'esposiciones de Banco Herrero n'Uviéu.

L'apertura, bien de recién, del Muséu del Xurásicu, enancha una ufierta que más p'alantre tendrá de completar el proyectu sobre la prehistoria de Teberga y otru gran proyectu que, pel momentu paez que ta nun segundu planu, ello ye, el muséu de la Siderurxa de Llangréu. La obra de remocique nel Arqueolóxicu, la creación del ecomuséu de La Nueva (Llangréu) y el proyectu, entovía por definir, n'antigua central térmica d'Ensidesa n'Avilés, y que guapamente podría ser un centru d'arte contemporáneu, son otros futuribles museos. De momentu, güei toca disfrutar de la entrada de baldre a tolos que yá esisten