Los muérganos de xestión del Parque Natural de Penubina-La Mesa aconceyen depués de cuatro años

|

La Xunta y la Comisión Xestora del Parque Natural de Penubina-La Mesa reuniéronse’l miércoles en La Pola Ḷḷena. Dellos grupos ambientales denunciaron hai un mes qu’estos muérganos llevaben ensin convocar cuatro años.

Nesta reunión, la conseyera d’Agroganadería y Recursos Autóctonos, María Jesús Álvarez, anunció l’aniciu del procesu pa la redaición d’un Plan Rector d’Usu y Xestión-Plan de Desarrollu Sostenible (PRUX-PDS) nuevu del espaciu natural, que, en pallabres de la socialista, ellaboraráse dende’l consensu y contará cola participación de tolos afeutaos. La convocatoria de los muérganos de xestión respuende a les reclamaciones qu’una docena de grupos ambientales treslladaron per escritu al Gobiernu esti mes d’abril tres años d’incumplimientu de les normatives por parte de la conseyería, obligada a entamar estes reuniones al menos una vegada al añu.

Sicasí, esti xestu sigue ensin convencer dafechu a estos coleutivos. Fructuoso Pontigo, de la Coordinadora Ecoloxista d’Asturies, considera que les alegaciones de los representantes ecoloxistes siguen ensin ser atendíes y que, anguaño, estes reuniones namái sirven pa salvar les apariencies, ensin ufrir la posibilidá d’un participación real qu’éstos demanden. Los grupos reclamen tamién más tresparencia y dilixencia a la hora d’informar sobre los Programas Añales de Xestión y recibir la Memoria añal, que s’entrega con una media de dos o trés años de retrasu.

Los coleutivos ambientales que sofiten estes demandes son la Coordinadora Ecoloxista d’Asturies, el Colectivo Ecologista de Avilés, la Plataforma por la Defensa de la Cordillera Cantábrica, l’Asociación para la Conservación y Estudio del Lobo (ASCEL), l’Instituto para la Calidad y la Educación Ambiental (INSCEAM), l’Asociación Verdes Asturianos, Ecoloxistes n’Aición d’Asturies, el Grupu d’Ornitoloxía Mavea, l’Asociación Medioambiental La Cirigüeña, SOS Cuideiru, l’Asociación para la Defensa Jurídica del Medio Ambiente-ULEX y  l’Asociación de Amigos de la Naturaleza Asturiana (ANA).

 

Contador Estadistiques