"Los monarques asturianos nun foron reis caudiellos, sinón reis mecenes”, asegura Monchu na charra d'Ástura

José Ramón García ‘Monchu’ ufrió’l martes nel Atenéu Obreru de Xixón la charra ‘La simboloxía precristiana na ilesia del Reinu d’Asturies’, entamada por Ástura. La bayura d’información fixo que quedaren munchos asuntos nel tinteru.

Y ye que la conferencia del ex capellán del Hospital Xeneral, pintor y estudiosu de la historia del país centróse sobre manera nos aspeutos venceyaos a los pueblos de cultura y tradiciones celtes que residieron nel noroestes de la Península Ibérica, necesarios pa entender la so influencia nel periodu posterior, lo que, por motivos de tiempu, impidió al sacerdote afondar nel tema que daba títulu a la mesma. Ensin dulda, una bona escusa pa dar continuidá a esti asuntu tan interesante nes sesiones próximes de les charres mensuales qu’entama l’asociación Ástura en collaboración col Atenéu Obreru de Xixón.

Xicu Xabel Díaz Yepes, presidente del coleutivu, encargóse de presentar a Monchu, que se declaró como un “historiador aficionáu” con esperiencia, pa depués facer una reflexón sobre la historia oficial y señalar que, al igual que Felipe V creó nel so momentu la Real Academia de la Historia de España, “los catalanes tienen el mesmu derechu a facer la so historia”. Darréu, el sacerdote entró nel tema cola ayuda de testos d’escritores antiguos y apuntes propios, retrocediendo hasta’l sieglu V a.C., momentu nel que la cultura celta d’orixe indoeuropea espandióse dende Persia hasta’l noroeste peninsular y la parte atlántica de lo que güei ye Portugal. “Los celtes nun yeren una raza, sinón una corriente cultural étnica”, apuntó.

Sociedaes de calter matriarcal

Ente les carauterístiques étniques de los pueblos ástures, destacó que yeren “comunidaes solidaries, celoses de la so independencia, que se confederaben cuando yeren agredíos pol esterior”. Los individuos d’estes comunidaes preferíen morrer enantes de ser dominaos, prauticaben el trueque y teníen como fonte de derechu’l sentíu común. La forma de organización yera al traviés d’asamblees plenaries nes que participaben tolos miembros adultos, teniendo les muyeres los mesmos derechos y obligaciones que los homes. El país de los ástures yera ricu n’oru, con una orfebrería mui orixinal, lo que llevó a los romanos a interesase por estes tierres. “Vinieron equí a esplotar y humillar”, dalgo polo que nun entiende qu’en Xixón haya un monumentu a Octavio Augusto “y non a los caudiellos asturianos”.

Pese a la llegada de los romanos, les tradiciones celtes pervivieron “con vitalidá”. “La romanización foi equí menos completa y les relixones indíxenes permanecieron vives”, pa lo que citó l’exemplu de la esistencia d’esteles con simboloxía celta “rellacionada cola muerte y el más allá” en llugares como Cuaña o Barros (Cantabria). Nesti puntu, Monchu apuntó que los romanos yeren politeístes, al contrario que los celtes, que yeren monoteístes, yá que creíen nuna mesma realidá manifestada de delles maneres, siendo les fontes, les cueves, les montañas, les culiebres y los caballos, llugares o seres venceyaos a la divinidá.

El sacerdote dio apuntes sobre les cruces esvástiques, símbolu relixosu y decorativu presente nel arte asturianu. Ésti simboliza la lluna, al igual que l’arcu de ferradura del que, apuntó, nun ye creación de los árabes como se piensa, yá qu’ésti tien presencia “nel periodu prehistóricu nel noroeste peninsular”. Les esteles discoidales son recoyíes pol cristinismu nos sieglos IV y V d. C., pa lo que Monchu punxo dellos exemplos enantes de finar la charra, al sobrepasase’l tiempu estipuláu, apuntando que la ilesia asturiana “yera heredera de la galaica”.

Ente los otros munchos apuntes fechos por Monchu a lo llargo de la so intervención destacó sobre manera l’afirmación de que’l Reinu d’Asturies “nun foi pequeñu”, señalando que la frontera llegó hasta’l Dueru, “una raya que respetaron los musulmanes”, y la de que los “monarques asturianos nun foron reis caudiellos, sinón reis mecenes, yá que crearon edificios, orfebrería y muncha cultura”.

Na semeya, Monchu, nun momentu de la intervención, acompañáu por Díaz Yepes.