Los medios de comunicación centren la segunda xornada de revisión del Llibru Blancu nel so 15 aniversariu

Esti miércoles va tener llugar n’Uviéu la segunda xornada del ciclu de meses-taller entituláu ‘15 años del Llibru Blancu: revisión y actualización de la política llingüística’. Ésta va tar dedicada a los medios de comunicación.

La Xunta pola Defensa de la Llingua Asturiana (XDLA) convidó pa tratar sobre la situación esta estaya tán importante pal procesu de normalización del idioma a cuatro persones venceyaes al mundu periodísticu en llingua asturiana. Asina, Naciu Varillas, Ana Vanessa Gutiérrez, Próspero Morán y Cristóbal Ruitiña van tratar sobre los ‘Medios de comunicación na sociedá de la información” nuna mesa que var tar moderada por Xulio Casado.

El salón d'actos del Departamentu de Filoloxía Española de la Universidá d'Uviéu va ser la sede d’ésta y de les otres dos charres que conformen esti ciclu de revisión del Llibru Blancu, previstes pal 15 y 29 d’esti mes, tres la inauguración de les mesmes en Xixón el 19 de xineru con un alderique alredor de la Educación. L’entamu de toles actividaes ta previstu pa les 18 hores.