Los Mazcaritos d’Uviéu tornen a percorrer l’Antiguu

|
La Destrozona

Una iniciativa de Paraíso Local Creativo impulsada por Ánxel Nava va permitir que La Destrozona o los Zaparrastros tornen a percorrer les cais del centru d’Uviéu. Ochenta años depués, los Mazcaritos d’Uviéu, esto ye, l’Antroxu tradicional, recupérase na ciudá.

Más de venti persones, a los qu’hai que sumar los músicos de Los Gascones, conformen la comparsa que va salir esta tarde, Xueves de Comadres (20 hores), peles cais del Antiguu, amás del Sábadu Frixueleru (18.30 hores), el Domingu Larderu (12.30 hores) y el Martes d’Antroxu (20 hores), cuando va entamase l’entierru de la sardina. D’esta forma, Paraíso Local Creativo recupera per primer vegada en Democracia n’Asturies una mazcarada urbana, los Mazcaritos d’Uviéu, que llevaben 80 años ensin salir.

La idea de recuperar esti Antroxu modernu nació en Paraxuga, cuando la responsable treslladó a Nava lo guapo que sería recuperar una tradición que’l PP llocal basó en carnavales foriatos y treslladó a la Cuaresma, la fin de selmana posterior al Miércoles de Ceniza. “Foi hai unos seis años y la idea quedó ehí”, señala l’artista, qu’a lo poco comenzó a estudiar documentos históricos y a recoyer información oral, escasa en dambos casos.

D’un llibru de Celsa García Valdés conoció que la celebración tamién se venceya al Corpus y del ‘Capricho 4’ de Goya’l sacó’l personaxe del Neñu La Rollona, mentes que d’otres informaciones foi recopilando información sobre los Sábanos, “fechos con sábanes y cobertores”, como se pueden ver nel históricu cuadru sobre los Mazcaritos d’Uviéu d’Evaristo Valle, o los Zaparrastros, “vestíos con sacos y que lleven esquiles”, asemeyaos a los d’otres mazcaraes.

Tamién apaecen otres personaxes burlescos comunes a otros aguilandos, como’l cura y el diañu, la madame y el madamu, el ciegu, l’osu y el zíngaru, amás de los soldaos, típicu del d'Uviéu… Pero’l personaxe clave de los Mazcaritos d’Uviéu ye La Destrozona, “un home antroxáu de muyer que lleva escoba y ye’l más provocador”. P’acompañar a toes estes figures va haber coples de carnaval y bailles, asuntu nel que collaboró enforma na so preparación Ánxel Álvarez El Maestru.

Cola salida d’esta tarde completáse una iniciativa perguapa d’años de trabayu cola que Nava y tolos participantes de Paraíso Local Creativo pretenden recupera y afitar l’Antroxu tradicional y, de pasu, algamar que, más pronto que tarde, sía’l referente de la ciudá en llugar del entamáu dende l’Alministración fuera de fecha. 

Na semeya, La Destrozona.

Contador Estadistiques