Los malos resultaos de les discográfiques nun son pola piratería

Según la prestixosa empresa d'estudios sobre internet, Forrester Research, la piratería na rede nun ye la responsable de la caída nes ventes de música. Anque les cifres de ventes baxaren nel últimu añu cásique un 15% nos EE.XX., la mentada empresa estadounidense diz que nun hai preba nenguna qu'indique qu'ente los consumidores habituales de música dixital hubiere una baxada de les ventes, conclusión a la que llegaren depués de facer una encuesta qu'inclúi a 1.000 'compradores per internet'.

L'informe tamién señala que, en bona midida, los malos resultaos de les compañíes discográfiques han echase a cuenta de que nun foren quién a adaptase a la rede pa facer meyor usu de les nueves posibilidaes de rellacionase col públicu consumidor y pa facer qu'espoxigaren les sos cuentes, "por exemplu", como recueye l'informe, "faciendo que sía más fácil pa los usuarios de la rede atopar, copiar y pagar pola música nunes condiciones más ventaxoses".

Otra de les conclusiones del estudiu ye que, pal añu 2007, prevese que les perres que mueva la venta electrónica de música algame'l valor d'alredor de 2 mil millones de dólares (un 17% del total de la industria musical), bien lloñe de los 3 millones de dólares que se recaldaren nel pasáu añu 2001, cuando 5 de les mayores discográfiques (BMG, EMI, Warner, Universal y Sony) echaren a andar servicios propios de venta "en-llinia".

Anque de momentu los servicios "en-llinia" de les discográfiques--Pressplay, MusicNet, FullAudio y Rhapsody--nun foren tovía quién a llamar l'atención de la xente como lo fixeren los sitios "non autorizaos" como Napster o Audiogalaxy (retiraos de la rede por orden xudicial), Forrester Research prediz que, d'equí a los prósimos trés años, les principales discográfiques van poder tar ufriendo yá un serviciu que realmente cumpla coles espectatives de los usuarios de la rede, posiblemente per aciu d'un contratu xenéricu ente les compañíes y los usuarios que faría posible grabar los CDs en casa y
reproducilos nuna amplia variedá de dispositivos.