Los mélicos convoquen delles xornaes de fuelga pal mes d'ochobre

|

El llunes 8 d’ochobre va tener llugar la primer xornada de fuelga convocada pol Sindicato Médico Profesional de Asturias (SIMPA). Ésta va ser de media xornada –al igual qu’otres cuatro más– como “una especie d’alvertencia”.

El presidente d'Atención Especializada del SIMPA, Ángel Colmeiro, señaló güei en rueda de prensa que la fuelga va principiar los díes 8, 9, 10, 11 y 15 d'ochobre, intentando que los paros tengan la "menor repercusión posible" pa los pacientes. Nel casu de nun llegar a nengún entendimientu col Gobiernu, los cerca de 4.000 facultativos entamarán xornaes de fuelga nueves, nesta ocasión a xornada completa, los díes 24, 25, 26 y 29 d'ochobre. Los paros podríen siguir en meses posteriores. Los mélicos dan esti pasu énte "l'agresión ensin precedentes" del Executivu a los sos derechos llaborales más allá de l'ampliación de xornada a 37,5 hores selmanales que yá teníen "asumida".

El secretariu xeneral del sindicatu, Antonio Matador, incidió en que la fuelga ye la vía que-yos queda pa "reconducir la situación hacia'l sentíu común" énte la falta d'alcuerdu col Gobiernu porque, cree, ta aprovechando'l decretu del Executivu central pa facer "un recorte na sanidá dirixíu puramente contra los médicos". Asina, al respeutive de les aiciones d'otros sindicatos del ámbitu sanitariu, incluyíu’l zarru na sede del Serviciu de Salú del Principáu d’Asturies (SESPA), dende'l SIMPA desvenceyáronse porque, dicen, l'agresión" a los derechos alquiríos de los médicos ye "enforma mayor" que nel casu d'otros emplegaos del SESPA.

En concreto, el SIMPA apuntó a una perda envalorada d'unos 3.410 euros añales pal mélicu mediu que fai cinco guardies al mes, con una xornada añal de 2.398 hores, daqué que nun asocede, afirma, "en nengún sector granible". D’igual forma, nel casu de los mélicos mayores de 55 años, calcula una perda salarial de 8.468 euros al añu, "un 20 por cientu" del sueldu. Ente los oxetivos de la convocatoria de fuelga destaquen que la xornada ordinaria nueva sía de 37,5 hores por aciu d’una prórroga diaria de media hora; la ponderación de 7,5 hores de xornada ordinaria añal per cada guardia que xenere descansu a otru día de la mesma y descansu ininterrumpíu de 36 hores selmanales con calter inmediatu a la guardia; y exención voluntaria d'Atención Siguida pa los mayores de 55 años, según l'aplicación n'atención especializada de los módulos d'atención siguida p'actividá asistencial a partir de les 15 hores

Tamién se busca l'aplicación de la exención d'Atención Siguida como mediu pa conciliar la vida llaboral y familiar; nes urxencies hospitalaries, la equiparación del horariu del cumplimientu de la xornada ordinaria al que s'aplica al restu de facultativos d'Atención Especializada o caltenimientu de les condiciones actuales; y nos servicios con veces rotatories o nocherniegos (SAC, SUAP, SAMU) la ponderación de la xornada ordinaria con un coeficiente de 1,28. Finalmente, dende'l SIMPA márquense como oxetivos el caltenimientu del emplegu temporal "en beneficiu de la calidá asistencial" y que l'allargamientu de la xornada tenga calter retribuíu económicamente, al igual que los programes especiales que quieran establecese per parte de l'Alministración.

 

Contador Estadistiques