Los llectores tienen disponible l'ensayu 'Una ciencia sin enfotu'

El testu col que Ramón d'Andrés ganó'l XXVII Premiu Máximo Fuertes Acevedo, correspondiente al 2021, preséntase n'Uviéu.

Nun ye'l primer actu nel que'l filólogu fala sobre l'ensayu 'Una ciencia sin enfotu', pero sí la primera col llibru físicu presente. Ediciones Trabe asoleyó va unes selmanes esti esperáu "manual básicu p'abrir los güeyos de cualquiera, filólogu o non, sobre la ciencia y non-ciencia que consumimos, asimilamos y creyemos al falar de llingües nel día a día", y agora dase a conocer formalmente dientro del ciclu Uviéu Abierto.

Va ser mañana, a les 19 hores, nel salón d'actos de la uvieína Biblioteca d'Asturies 'Ramón Pérez de Ayala', con entrada llibre. D'Andrés va tar acompañáu na cita por Alfredo Álvarez, profesor de Filoloxía Española y Asturiana na Universidá d'Uviéu.