Los llectores d'Asturies.com refuguen el zarru d'empreses públiques por ser un "serviciu públicu necesariu"

El 75 por cientu de los usuarios d'Asturies.com que participó nel nuesu 'Conceyu Abiertu' amosó'l so refugu al zarru d'empreses públiques, como obliga la llei y demanda Cristóbal Montoro. Considera que son "un serviciu públicu necesariu"

Nesta ocasión entrugábamos ' ¿Aprueba la decisión de Montoro de demandar a los conceyos el pieslle d'empreses públiques deficitaries?', a lo qu'un 75 por cientu afirmara que 'Non, porque son un serviciu públicu necesariu', mentes que'l 25 por cientu sí defendíen el so zarru 'porque tán mal xestionaes y suponen un gastu pa los ayuntamientos'. Cola entrada de la Llei de Racionalización y Sostenibilidá de l'Alministración Llocal, les empreses públiques que tienen desiquilibriu financieru deberíen zarrar, como recordó'l propiu ministru de Facienda y Alministraciones Públiques en funciones vía postal a dellos conceyos, ente ellos el de Xixón, lo qu'afeutaría a EMTUSA o Divertia.

Dende esti momentu yá ye posible participar nun 'Conceyu Abiertu' nuevu. Nesta ocasión queremos conocer la opinión de los nuesos llectores sobre la posibilidá de prohibir los toros por llei nel país, dalgo que pretende llevar Podemos Asturies a la Xunta Xeneral nel cursu políticu nuevu.