Los llectores d’Asturies.com nun creen que la XE mereza'l Premio Princesa de Asturias de la Concordia

Un 52 por cientu de los usuarios d’Asturies.com nun sofiten el fallu del xuráu del Princesa de Asturias de la Concordia, que foi pa la Xunión Europea (XE). Mentes, un 32 por cientu de los participantes en 'Conceyu Abiertu' diz nun tar interesáu nestos gallardones.

La entruga plantegada nesta ocasión foi ‘¿Ye merecedora la Xunión Europea del Premio Princesa de Asturias de la Concordia?’, a lo qu’un 52 por cientu respondió que ‘Non’, por un 16 por cientu que consideró que ‘Sí’. Otra manera, los Premios Princesa de Asturias nun interesa al 32 por cientu de los nuesos llectores.

L’eurodiputáu socialista Jonás Fernández Álvarez foi la persona que presentó la candidatura de la XE pa la edición d’esti añu coincidiendo col sesentenu aniversariu del Tratáu de Roma, recibiendo’l sofitu de, ente otros, los ex presidentes del Estáu Felipe González y José Luis Rodríguez Zapatero; los ex presidentes del Parllamentu Européu Josep Borrell, Nicole Fontaine y Hans-Gert Pöttering; Joaquín Almunia, exvicepresidente de la Comisión Europea; Martín Torrijos, ex presidente de Panamá; y Julio María Sanguinetti, ex presidente d’Uruguai. El xuráu destacó que la XE ye un “modelu únicu d’integración política supranacional con base nuna asociación pacífica, progresiva y llibre de sus miembros”.

Dende esti momentu yá ye posible participar nun ‘Conceyu Abiertu’ nuevu. Nesta ocasión prestaríanos conocer la opinión de los nuesos usuarios sobre l’avance la III Encuesta Sociollingüística d’Asturies que se dio a conocer la selmana pasada.