Los llectores d'Asturies.com nun acepten más retrasos na variante de Payares

Un 70 por cientu de los usuarios d'Asturies.com nun considera aceptable más retrasos na obra de la variante de Payares. Los plazos nuevos, tres los problemes atopaos col sistema de ventilación, sitúen l'apertura de los túneles pal 2018.

Nel 'Conceyu Abiertu' que plantegamos esta selmana entrugábamos a los nuesos llectores si '¿Tien xustificación el retrasu nuevu de la variante de Payares?'. Un 70 por cientu respondía que 'non, ye un retrasu más d'una obra importante que nun recibió les cantidaes que sí tuvieron dellos trabayos n'otros territorios', mentes qu'un 30 por cientu afirmaba que 'sí, yá que se debe a temes téunicos que son habituales nesti tipu d'obra, a lo qu'hai que sumar la situación económica actual'.

L'últimu problema atopáu ye una deficiencia del proyeutu del sistema de ventilación y antiincendios de los túneles que va obligar a replantegalu, retrasando hasta al menos 2018 la posible apertura de la variante, ocho años más tarde de lo previsto cuando se diseñó la obra.

Dende esti momentu yá ye posible participar nun 'Conceyu Abiertu' nuevu. Nesta ocasión queremos conocer la opinión de los nuesos usuarios sobre l'usu que'l presidente del país da al Diccionariu de l'Academia de la Llingua Asturiana. Nuna entrevista en TPA pudo vese esti llibru de consulta nel despachu de Javier Fernández siendo utilizáu pa ellevar la pantalla del ordenador.