Los llectores d’Asturies.com demanden una mayor vixilancia del patrimoniu natural

El 78 por cientu de los usuarios d’Asturies.com que participaron nel nuesu ‘Conceyu Abiertu’ ve necesario una mayor vixilancia del nuesu patrimoniu natural pol aumentu de visitantes. L’incidente de los Llagos ye un bon exemplu de les consecuencies d’esta medría.

La fola de fríu qu’afeutó recién a Asturies provocó temperatures perbaxes que xelaron fontes y llagos, ente ellos l’Ercina. Esta postal fixo que dalgunes persones caleyaren pel xelu cola intención de llevase un recuerdu que casi fina en desgracia al frayase ésti pol pesu de los turistes.

Por mor d’esta situación asocedida énte la falta de seguridá nesta zona, y les repercusiones sobre la nuesa natura que supón la presencia de cada vez más visitantes, llanzamos a los nuesos llectores la entruga ‘Vistu l’incidente de los Llagos, ¿debería haber una mayor vixilancia del nuesu patrimoniu natural?’, a lo qu’un 78 por cientu respondió ‘Sí, porque la presencia de numberosos visitantes torga la so conservación’. Por contra, un 22 por cientu votó pola opción ‘Non, yá que son casos mui aisllaos y sería mui costoso aumentar la seguridá’.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos usuarios sobre la situación de les llistes d’espera na sanidá asturiano.