Los llectores d'Asturies.com creen que Mercedes Fernández fai un favor al idioma cola so actitú necia

El 74 por cientu de los llectores d'Asturies.com piensa que Mercedes Fernández fai un favor al idioma cola obsesión que ta amosando contra l'asturianu. Entiende que les sos pallabres descalifiquen de por sí a la diputada y presidenta del PP asturianu.

Nel nuesu 'Conceyu Abiertu' plantegábamos la entruga '¿Fai un favor Mercedes Fernández al asturianu cola so obsesión contra l'idioma?', a lo qu'un 73 por cientu respondió 'Sí, descalifícase ella sola'. Por contra, un 26 por cientu señaló la opción 'Non, estos ataques consiguen desprestixar la llingua asturiana ente la sociedá'.

Fernández vien protagonizando les selmanes últimes una polémica con respeuto al asturianu al negase al so emplegu na Comisión d’Estudiu sobre Réxime, Proteición y Promoción del Asturianu tres una propuesta d'Izquierda Xunida de facer les convocatories billingües. El reglamentu, nesti casu, da la razón a la dirixente popular, polo que l'asturianu nun se ta utilizando nuna comisión sobre'l propiu idioma, dándose una situación superrealista dafechu.

Dende esti momentu yá ye posible participar nun 'Conceyu Abiertu' nuevu. Nesta ocasión queremos saber qué opinen los nuesos usuarios sobre'l procesu pa conformar Gobiernu a nivel estatal.