Los llectores d’Asturies.com consideren que’l preciu de la botella de sidra ye l’afayadizu

El 60 por cientu de los usuarios d’Asturies.com opina que’l preciu actual de la botella de sidra, asitiáu xeneralmente ente los 2,50 y les 2,70 euros, ye l’afayadizu. Namái un 16 por cientu opina qu’ésti ye baratu, al igual que dalgunos llagareros y hosteleros que demanden encaracer el productu.

Nun foru públicu, dalgunos profesionales de la sidra llegaron a apuntar que’l preciu de la botella debería tar ente los 5 y 7 euros, unes cantidaes que nun paecen tener sofitu popular, como amuesa’l nuesu ‘Conceyu Abiertu’. Un 60 por cientu considera que l’actual ye l’afayadizu, por un 16 por cientu que cree que ye baratu. Mentes, esiste un 24 por cientu qu’inclusive velo caru.

Dende esti momentu yá ye posible participar nun ‘Conceyu Abiertu’ nuevu. Nesta ocasión, aprovechando’l parón de les sesiones de comparecencies informatives de la Comisión Especial d’Estudiu sobre'l Réxime de Proteición y Promoción del Asturianu hasta mayu, queremos conocer la so opinión sobre la so utilidá.